Wararka24:Dowladda Soomaaliya ayaa faahfaahin dheeraad ah ka bixisay musiibo badeed oo ay ku dhinteen ugu yaraan 17 dhalinyaro Soomaaliyeed, kuwaas oo tahriib ku marayay badda u dhexeysa Algeria iyo Spain.
Guddoomiyaha Hay’adda Maareynta Musiibooyinka Qaranka, Maxamuud Macallin, ayaa sheegay in dhalinyarada geeriyootay ay isugu jiraan 12 wiil iyo 5 gabdhood, kuwaas oo da’doodu u dhaxeysay 18 ilaa 30 sano.
Mas’uulka ayaa tilmaamay in hay’addu ay hayso sawirrada qaar ka mid ah dadka dhintay, isla markaana ay waddo dadaallo lagu xaqiijinayo xog dhameystiran. Wuxuu ugu baaqay waalidiinta inay la xiriiraan hay’adda si loo helo macluumaad dheeraad ah oo ku saabsan carruurtooda.
Sidoo kale, SoDMA ayaa ka digtay khatarta sii kordheysa ee tahriibka, iyadoo xustay in sanadihii u dambeeyay ay bateen dhacdooyinka noocan oo kale ah ee ay ku dhintaan dhalinyaro Soomaaliyeed.
Guddoomiyaha ayaa si gaar ah ugu baaqay dhalinyarada inay ka fogaadaan safarrada halista ah, isagoo sheegay in tahriibku yahay mid adag oo nafta halis gelinaya, isla markaana aan mar walba la gaari karin himilada laga leeyahay.
Badda Mediterranean-ka ayaa weli ah marin aad u halis badan oo ay adeegsadaan tahriibayaal doonaya inay gaaraan Yurub, inkastoo ay si joogto ah uga dhacaan shilal dhimasho iyo musiibooyin bini’aadantinimo.
Dhacdadan ayaa mar kale muujineysa baahida loo qabo xal waara oo lagu wajahayo tahriibka, iyadoo loo baahan yahay iskaashi u dhexeeya dowladda, hay’adaha caalamiga ah iyo bulshada si loo badbaadiyo nolosha dhalinyarada.
