Wararka24: 1-02-2026:Golaha Wasiirrada Boqortooyada Sucuudiga ayaa mar kale si cad u adkeeyay mowqifkooda ku aaddan taageerada buuxda ee madaxbannaanida, midnimada iyo wadajirka dhuleed ee Jamhuuriyadda Federaalka Soomaaliya, iyagoo si adag u diiday isku-day kasta oo lagu abuurayo maamullo bar-bar yaalla oo wiiqaya qarannimada dalka.
Go’aankan ayaa kasoo baxay kulan toddobaadle ah oo Golaha Wasiirrada Sucuudiga ku yeesheen magaalada Riyadh, kaas oo uu guddoominayay Boqor Salmaan bin Cabdicasiis, sida ay baahisay Wakaaladda Wararka Sucuudiga ee SPA.
Bayaanka kasoo baxay kulanka ayaa lagu sheegay in Boqortooyada Sucuudiga ay si buuxda uga soo horjeeddo nidaam kasta oo bar-bar yaalla oo lid ku ah midnimada Soomaaliya iyo xuduudaheeda caalamku aqoonsan yahay, iyadoo Riyadh ay ka digtay faragelin kasta oo wax u dhimaysa gobonimada dalka.
Hadalkan ayaa kusoo aadaya xilli ay dowladda Federaalka Soomaaliya kordhisay dadaalladeeda diblomaasiyadeed, kaddib go’aankii Israa’iil ay bishii December ee la soo dhaafay ku aqoonsatay Somaliland, oo ku dhawaaqday gooni-isu-taag sannadkii 1991-kii, balse aan weli helin aqoonsi caalami ah oo buuxa.
Sidoo kale, xukuumadda Sucuudiga ayaa soo dhoweysay qodobadii kasoo baxay shirkii degdegga ahaa ee Wasiirrada Arrimaha Dibadda Ururka Iskaashiga Islaamka (OIC), kaas oo bishii hore ka dhacay magaalada Jeddah, lana xiriiray xaaladda Soomaaliya. Shirkaas, oo ay codsatay dowladda Soomaaliya, ayaa si cad u xoojiyay mowqifka OIC ee garab istaagga midnimada iyo wadajirka dhuleed ee Soomaaliya.
Ururka OIC ayaa cambaareeyay tallaabo kasta oo dhiirrigelinaysa kala-qaybsanaanta Soomaaliya ama dib-u-jeexidda xuduudaha Geeska Afrika, gobol lagu tilmaamay mid leh muhiimad istiraatiijiyadeed oo caalami ah.
Dowladda Federaalka Soomaaliya ayaa hore u sheegtay in aqoonsi kasta oo la siiyo Somaliland uu yahay mid baal-marsan sharciga caalamiga ah, isla markaana halis ku ah xasilloonida gobolka, iyadoo ku adkeysatay in dowladnimo aan lagu dhisi karin hannaan hal dhinac ah oo aan raalli ka ahayn dowladda dhexe.
Hadalka ka yimid Sucuudiga ayaa imanaya xilli uu sii kordhayo loolanka juqraafi-siyaasadeed ee Badda Cas iyo Gacanka Cadmeed, iyadoo khubaro goboleed ay ka digayaan in tartanka quwadaha shisheeye uu sii hurin karo khilaafyada gudaha Soomaaliya.
Boqortooyada Sucuudiga, oo ka mid ah saaxiibbada ugu dhow Soomaaliya ee dhinacyada diblomaasiyadda iyo gargaarka bani’aadantinimo, ayaa farriintan u aragta mid lagu mideynayo mowqifka caalamiga ah ee ka dhanka ah kala-qaybsanaanta Soomaaliya, xilli gobolku wajahayo marxalad xasaasi ah.
