Wararka24: 1-02-2026: Dowladda Federaalka Soomaaliya ee Muqdisho ayaa goordhow dib u celisay diyaarado siday ciidamo hubeysan oo ay iska soo hormariyeen madaxweynayaasha maamullada Jubbaland iyo Puntland, kuwaas oo saaka kasoo ambabaxay magaalooyinka Kismaayo iyo Garoowe.
Ilo wareedyo xilkas ah ayaa Wararka24 u xaqiijiyay in Hay’adda Duulista Hawada Soomaaliya la siiyay amar toos ah oo lagu joojinayo diyaarad kasta oo sida ciidamo hubeysan oo kasoo duuleysa labadaas magaalo, iyadoo tallaabadan lagu sababeeyay arrimo la xiriira amniga qaranka.
Wararka ayaa sheegaya in go’aankan uu yimid kadib markii Jubbaland iyo Puntland ay ku xadgudbeen habraacyadii amni ee horay loogu heshiiyay kulamadii guddiyada farsamada, kuwaas oo dhigayay in madaxweynada maamullada loo ogolaado tiro kooban oo ilaalo ah.
Sida ay ogaatay Wararka24, Dowladda Federaalka ayaa u ogolaatay mid kasta oo ka mid ah labada maamul in ay la yimaadaan 40 ilaa 50 askari oo ay ku jiraan ilaalo gaar ah, balse qodobkaasi ayaa la jabiyay kadib markii la soo diray ciidamo ka badan intii lagu heshiiyay, taas oo keentay in diyaaradaha dib loo celiyo.
Dhanka kale, waxaa haatan Muqdisho ka socda shir deg-deg ah oo u dhexeeya guddiyada farsamada ee Dowladda Federaalka iyo kuwa Jubbaland iyo Puntland, si xal looga gaaro arrintan, maadaama ay saameyn ku yeelan karto geeddi-socodka wada-hadallada siyaasadeed.
Illaa iyo hadda, wax war ah kama soo bixin dhinacyada Jubbaland iyo Puntland oo ku saabsan go’aanka dowladda dhexe ee la xiriira dib u celinta ciidamadooda.
Arrintan ayaa kusoo aadeysa xilli ay horay madaxweynayaasha Jubbaland iyo Puntland uga gaabsadeen inay tagaan Villa Somalia, iyagoo doorbiday in wada-hadalladu ka dhacaan goob ka baxsan madaxtooyada oo la isku halleyn karo.
Si kastaba ha ahaatee, Isniinta berri ah ayaa la filayaa in si rasmi ah loo bilaabo wada-hadallada, kuwaas oo diiradda lagu saari doono arrimaha doorashooyinka, dastuurka, midnimada qaranka, dagaallada ka dhanka ah argagixisada, iyo xaaladaha abaaraha.
