Wararka24: Dowladda Federaalka Soomaaliya ayaa maanta si rasmi ah u diiwaangelisay markabka Guney oo qaatay calanka Soomaaliya, sida uu shaaciyay Wasiirka Dekedaha iyo Gaadiidka Badda Cabdulqaadir Maxamed Nuur.
Wasiirka ayaa sheegay in tani ay tahay markii ugu horreysay tan iyo burburkii dalka oo markab lagu diiwaangeliyo calanka Soomaaliya, taas oo loo arko tallaabo muhiim ah oo dib u soo nooleynaysa sumcadda calanka.
Qoraal kasoo baxay wasaaradda ayaa lagu sheegay in diiwaangelintan ay timid kadib markii la dhammaystiray dhammaan shuruucdii iyo nidaamyadii looga baahnaain in dal uu bixiyo Calan.
Wasaaradda ayaa sidoo kale ugu baaqday ganacsatada iyo milkiilayaasha maraakiibta inay ka faa’iideystaan fursaddan, kuna diiwaangeliyaan maraakiibtooda calanka Soomaaliya.
“Diiwaangelinta Guney waxay fursad u tahay horumarinta dhaqaalaha dalka,” ayaa lagu yiri bayaanka.
Tallaabadan ayaa qeyb ka ah qorshayaasha dowladda ee lagu xoojinayo dhaqaalaha iyo kobcinta ganacsiga badda, iyadoo la doonayo in Soomaaliya ay dib u hesho doorkeedii maraakiibta iyo gaadiidka badda.
Dowladda Federaalka Soomaaliya ayaa sheegtay in horumarradan ay ka tarjumayaan isbeddellada ka socda dalka, gaar ahaan dhinacyada dhaqaalaha iyo ganacsiga.
