Dowladda Federaalka Soomaaliya ayaa si weyn u soo dhaweysay kordhinta hawlgallada milatari ee Mareykanku ka wado gudaha dalka, iyadoo ku tilmaantay tallaabo muhiim u ah xoojinta amniga iyo jiritaanka dowladnimada.
Danjiraha Soomaaliya u fadhiya Mareykanka, Daahir Xasan Cabdi, ayaa warbaahinta Mareykanka u sheegay in iskaashiga amniga ee u dhexeeya Muqdisho iyo Washington uu marayo heerkii ugu sarreeyay abid. “Mareykanku weli waa saaxiib muhiim ah oo aan kala shaqeyno amniga iyo la-dagaallanka argagixisada,” ayuu yiri, isagoo xusay in dowladda Soomaaliya ay diiradda saareyso natiijooyinka dhabta ah ee la gaari karo.
Sida laga soo xigtay xogaha la helay, ciidamada Mareykanka ayaa sanadkii 2025 fuliyay duqeymo cirka ah oo aad uga badan kuwii sannadihii ka horreeyay, halka billowgii 2026-na ay sii kordheen hawlgallada ka dhanka ah Al-Shabaab iyo Daacish. Mas’uuliyiinta Soomaaliya ayaa ku dooday in kordhinta duqeymahan ay gacan ka geysatay wiiqidda awoodda kooxaha hubeysan ee ku sugan meelo istiraatiiji ah.
Dowladda Soomaaliya ayaa sidoo kale sheegtay in taageerada amni ee Mareykanka ay kaalin ka qaadatay sugidda amniga caasimadda, taas oo sahashay in dhammaadkii 2025 la qabto doorashooyin goleyaasha deegaanka oo ka dhacay Muqdisho, kuwaas oo ahaa codbixin toos ah oo muddo dheer kaddib ka dhacda caasimadda.
Dhanka kale, xiriirka labada dal waxaa saameeyay arrimo bini’aadannimo, kaddib markii Mareykanku si ku-meel-gaar ah u hakiyay gargaar cunto oo loo waday Soomaaliya, arrin ay Dowladda Federaalka ku tilmaantay mid aan saameyn ku yeelanayn wada-shaqeynta amni ee labada dhinac. Gargaarka ayaa dib loo fasaxay kaddib wada-hadallo iyo xaqiijinno ku saabsan ilaalinta sahayda.
Falanqeeyayaal ayaa xusay in inkastoo hawlgallada milatari ay wiiqeen awoodda kooxaha hubeysan, haddana xasillooni waarta ay u baahan tahay in la xoojiyo dhinacyada maamul wanaagga, adeegyada bulshada iyo taageerada bini’aadannimo, si guulaha amniga u noqdaan kuwo waara.
