Madaxweynaha Puntland, Siciid Cabdullaahi Deni, iyo Madaxweynaha Jubaland, Axmed Maxamed Islaam (Axmed Madoobe), ayaa ku kulmaya magaalada Nairobi ee dalka Kenya, iyaga oo ka wada hadlaya xaaladda cakiran ee siyaasadda Soomaaliya.
Kulanka ayaa diiradda lagu saarayaa is-afgarad laga gaaro mowqifyada ay labada maamul ka taagan yihiin arrimaha Federaalka, doorashooyinka soo socda, iyo dib-u-eegista dastuurka. Ilo-wareedyo siyaasadeed ayaa sheegaya in labada masuul ay doonayaan inay mideeyaan aragtidooda si ay cod adag ugu yeeshaan go’aamada muhiimka ah ee dalka.
Labada hoggaamiye Siciid iyo ahmed ayaa horey uga baaqsaday shirar ay isugu yeertay dowladda Federaalka, iyagoo sheegaya in aan la tixgelin doorkooda iyo cabashooyinka ka jira dhinacyadooda. Sidaa darteed, kulanka Nairobi ayaa ah dadaal cusub oo lagu adkeynayo midnimada mowqifkooda siyaasadeed.
Shirkan waxa uu ku soo beegmayaa xilli Soomaaliya ay wajahayo marxalad adag, iyadoo la isku mari la’yahay hab-raaca doorashooyinka, dib-u-habeynta dastuurka, iyo xiriirka u dhexeeya dowladda dhexe iyo dowlad-goboleedyada.
Wararka ayaa sidoo kale muujinaya in kulankan uu noqon karo mid horseeda in la sameeyo iskaashi ballaaran oo ay hoggaanka Puntland iyo Jubaland ku wajahayaan siyaasadda Villa Soomaaliya.
Waxaa la filayaa in natiijada kulankan ay saamayn ku yeelato jihada siyaasadeed ee dalka, iyadoo laga war sugayo war-saxaafadeed rasmi ah oo ka soo baxa labada dhinac.
