Wararka24: Safiirka Jamhuuriyadda Federaalka Soomaaliya u fadhiya Azerbaijan, Mudane Cabdinuur Daahir Fiidow, ayaa si rasmi ah waraaqihiisa aqoonsiga safiirnimo ugu gudbiyay Madaxweynaha dalkaas Ilham Aliyev, sida lagu shaaciyay war rasmi ah.
Intii lagu guda jiray kulanka, Safiirka ayaa Madaxweynaha Azerbaijan u gudbiyay farriin iyo salaan uu ka siday Madaxweynaha Soomaaliya Xasan Sheekh Maxamuud, taasoo si diirran loo soo dhaweeyay, laguna muujiyay xiriirka sii kobcaya ee u dhexeeya labada dal.
Kulanka ayaa sidoo kale lagu xusay booqashadii taariikhiga ahayd ee sanadkii 2025 uu Madaxweynaha Soomaaliya ku tagay Azerbaijan, taas oo loo arko mid furtay bog cusub oo xiriirka diblomaasiyadeed iyo iskaashiga laba geesoodka ah.
Labada dhinac ayaa muujiyay horumarka xiriirka siyaasadeed, iyagoo carrabka ku adkeeyay muhiimadda ay leedahay in la ballaariyo iskaashiga dhinacyada ganacsiga, tamarta, waxbarashada iyo horumarinta hay’adaha dowliga ah. Waxaa si gaar ah loo xusay hirgelinta nidaamka ASAN Khidmet oo Azerbaijan ka hirgelisay adeegyada dowliga ah, laguna wado in la gaarsiiyo Soomaaliya.
Sidoo kale, kulanka ayaa lagu muujiyay dadaalka ay Soomaaliya ugu jirto ballaarinta xiriirrada diblomaasiyadeed iyo kala-duwanaanshaha iskaashiyada istiraatiijiga ah ee caalamiga ah.
Madaxweynaha Azerbaijan ayaa u rajeeyay Safiirka cusub guul iyo in uu si hufan u guto waajibaadkiisa, halka Safiir Cabdinuur Daahir uu caddeeyay sida ay Soomaaliya uga go’an tahay xoojinta xiriirka labada dal.
