Wararka24: Warar soo baxaya ayaa sheegaya in hakad uu galay qayb ka mid ah shaqooyinkii Hay’adda Dambi-baarista Soomaaliya (CID), kadib markii la sheegay in baaritaanno la xiriira musuq-maasuq iyo maamul-xumo lagu sameeyay saraakiil ka tirsan hay’adda.
Sida ay tilmaamayaan wararka la helayo, saddex sarkaal ayaa lagu eedeeyay inay ku lug lahaayeen falal la xiriira wax-is-daba-marin iyo arrimo maaliyadeed. Wararka ayaa sidoo kale sheegaya in saraakiishaasi ay ka baxeen dalka xilli ay socdeen baaritaanno lagu sameynayay.
Hakadka ugu weyn ayaa la sheegay inuu saameeyay adeegyada waraaqaha dambi-la’aanta, kuwaas oo ay muwaadiniintu u isticmaalaan arrimo ay ka mid yihiin baasaboorro iyo codsiyada fiisooyinka. Dad badan ayaa la kulmay dib-u-dhac ku yimid helitaanka adeegyadaas.
Bilihii u dambeeyay waxaa muran dhinaca maamulka dhaqaalaha ka dhashay uu ka dhex taagnaa taliyaha CID, Ibraahim Aadan Dhaayow, iyo sarkaalkii baxsaday ee maamulayay qaybta fara-dhigista. Murankaas ayaa salka ku hayay cidda si toos ah u maamuleysa dakhliga ka soo xarooda waraaqaha dambi-la’aanta.
Sidoo kale, wararku waxay sheegayaan inuu jiray muran maamul iyo mid maaliyadeed oo ka dhex taagnaa mas’uuliyiin ka tirsan hay’adda, kaas oo la xiriiray maamulka dakhliga kasoo xarooda adeegyada qaarkood. Hase yeeshee, mas’uuliyiinta ay arrintani quseyso weli si rasmi ah ugama aysan hadlin eedeymahaasi.
Waxaa sidoo kale la hadal hayaa lacag dheeraad ah oo lagu soo kordhiyay qaar ka mid ah adeegyada, taas oo dhalisay su’aalo la xiriira habka loo maamulayo dakhliga iyo sharciyaddiisa.
Dhanka kale, khubarada maamulka iyo isla-xisaabtanka ayaa marar badan ka digay saameynta ay musuq-maasuqa, eexda iyo shaqaaleysiinta ku saleysan qaraabo-kiilka ku yeelan karaan hufnaanta hay’adaha dowladda iyo tayada adeegyada ay bixiyaan.
Ilaa hadda ma jiro war rasmi ah oo kasoo baxay Hay’adda CID, Somali Police Force ama hay’adaha kale ee dowladda oo xaqiijinaya dhammaan eedeymaha la xiriira kiiskan, waxaana la filayaa in baaritaannada socda ay caddeyn dheeraad ah ka bixiyaan arrintan.
