Shaqaalaha ka shaqeeya dalka Qatar ee looga baahdo inay shaqeeyaan maalinta nasashada toddobaadka ayaa xaq u leh in loo magdhabo, ha ahaato maalin kale oo nasasho ah ama lacag dheeri ah, sida uu dhigayo sharciga shaqada ee dalkaas.
Arrintan ayaa dib u soo shaac baxday kadib markii warbaahinta Legit.ng ay bahisay faahfaahinta Qodobka 75-aad ee Sharciga Shaqada ee Qatar, kaas oo ah Sharciga Lambarka 14 ee sannadka 2004. Ma aha xeer cusub, balse waa xuquuq horey u jirtay oo shaqaale badan aysan ka warqabin.
Xuquuqda shaqaalaha maalinta nasashada
Sida uu dhigayo sharcigu, shaqaale kasta wuxuu xaq u leeyahay nasasho toddobaadle ah oo mushahar leh, aanna ka yarayn 24 saacadood oo is xigta. Maalinta Jimcaha ayaa ah maalinta nasashada, marka laga reebo shaqaalaha ku shaqeeya nidaamka wareegga ama shift-ka.
Haddii xaaladdu ay keento in shaqaalaha la shaqeysiiyo maalintaas, loo-shaqeeyaha waa inuu siiyaa maalin kale oo nasasho ah, ama uu ku bixiyaa mushaharka aasaasiga ah ee maalintaas iyo kordhin aan ka yarayn 150 boqolkiiba. Sharciga ayaa sidoo kale mamnuucaya in shaqaale la shaqeysiiyo in ka badan laba Jimce oo is xiga.
Saacadaha shaqada iyo overtime-ka ee Qatar
Sharciga ayaa xaddidaya saacadaha shaqada oo ah ugu badnaan 48 saacadood toddobaadkii, ama 8 saacadood maalintii. Bisha Ramadaanta waxaa saacadaha la dhimaa ilaa 36 saacadood toddobaadkii, ama 6 saacadood maalintii.
Saacadaha dheeraadka ah ee shaqada (overtime) waa in aysan wadarta shaqada maalinlaha ah ka dhigin wax ka badan 10 saacadood. Saacad kasta oo dheeraad ah waxaa lagu bixiyaa mushaharka caadiga ah iyo ugu yaraan 25 boqolkiiba, halka shaqada habeenkii u dhaxaysa 9-ka fiidnimo ilaa 6-da subaxnimo la siiyo ugu yaraan 50 boqolkiiba, marka laga reebo shaqaalaha shift-ka.
Shaqaalaha dareema in ninka boss koda ah uusan u hoggaansamin xeerarkan ayaa cabasho rasmi ah u gudbin kara Wasaaradda Shaqada ee Qatar, ama ka codsan kara sharraxaad dheeraad ah.
Qatar ayaa ka mid ah dalalka Khaliijka ee ay ka shaqeeyaan shaqaale badan oo ka yimid Afrika iyo Aasiya, kuwaas oo inta badan ka shaqeeya dhismaha, adeegyada iyo shaqada guryaha. Shaqaalaha guryaha ayaa leh sharci gaar ah, sidaas darteed xeerarkan si toos ah uma khuseeyaan.
