Wararka24: Maamulka Puntland ayaa shaaca ka qaaday inuu ka arrinsanayo xaaladda siyaasadeed ee ka jirta Soomaaliya, xilli uu sii xoogeysanayo khilaafka la xiriira nooca doorasho ee dalka loo jihaynayo bilaha soo socda. Hadalkan ayaa muujinaya heerka xiisadda ee u dhexeysa Puntland iyo dowladda federaalka.
Wasiirka Arrimaha Gudaha Puntland Cabdi Xirsi Cali ayaa sheegay in dowladda federaalka aysan wax taageero ah siin Puntland, isla markaana ay wado tallaabooyin uu ku tilmaamay kuwo lid ku ah amniga maamulka. Wuxuu xusay in Puntland ay hadda ka fikirayso mustaqbalkeeda siyaasadeed.
Xiisaddan ayaa kusoo aadeysa xilli ay is dhaafsanayaan hadallo kulul madaxda Puntland iyo kuwa dowladda federaalka. Madaxtooyada Puntland ayaa si adag uga jawaabtay hadallo uu jeediyay Ra’iisul Wasaaraha Xamza Cabdi Barre, kuwaas oo la xiriiray aragtida doorashada iyo midnimada dalka.
Dhanka kale, Wasiiru Dowlaha Madaxtooyada Puntland Cabdifataax Maxamed Nuur ayaa ku tilmaamay hadallada Ra’iisul Wasaaraha kuwo aan la aqbali karin, isagoo sheegay inay xambaarsan yihiin hanjabaad siyaasadeed. Wuxuu sidoo kale dhaliilay qaabka dowladda federaalka u wajahday arrimaha dowlad-goboleedyada.
Ra’iisul Wasaaraha Soomaaliya ayaa hore u sheegay in ciidamada dowladda ay diyaar u yihiin inay tallaabo ka qaadaan cid kasta oo ka hor timaada qorshaha doorashada. Wuxuu carrabka ku adkeeyay in ilaalinta midnimada dalka ay tahay waajibaad qaran.
Wararka ayaa sidoo kale sheegaya in Madaxweyne Puntland uu heegan geliyay ciidamada maamulka, isagoo faray inay u diyaar garoobaan xaalad kasta oo amni. Tani waxay sare u qaaday walaaca laga qabo isku dhac siyaasadeed oo sii xoogeysta.
Khilaafka u dhexeeya Puntland iyo dowladda federaalka ayaa soo jiitamayay muddo, balse xaaladda hadda jirta ayaa u muuqata mid sii cakirmaysa, iyadoo labada dhinac ay weli ku kala aragti duwan yihiin mustaqbalka siyaasadeed ee dalka.
