Wararka24: Maamulka Puntland ayaa si cad u sheegay inuusan aqbaleyn in Madaxweynaha Xasan Sheekh Maxamuud uu xilka sii hayo wixii ka dambeeya 15-ka May 2026, oo ah marka uu ku egyahay muddo xileedkiisa dastuuriga ah.
Wasiir ku-xigeenka Warfaafinta Puntland, Bile Qabowsade, ayaa sheegay in maamulka uu ku adkeysanayo in si degdeg ah loo qabto doorasho lagu heshiiyay oo ay dhammaan dhinacyadu wada aqbalaan.
“Soomaali waxa keliya ee ku wada jiri kartaa waa in la ilaaliyo nidaamka federaalka iyo doorasho lagu yahay heshiis oo la isla aqbalo,” ayuu yiri wasiirku, isagoo ka digay in dalka uu galo firaaq dastuuri ah.
Puntland ayaa sidoo kale caddeysay in aysan aqbaleyn muddo kordhin, islamarkaana ay qaadi doonto tallaabooyin haddii ay dhacdo in xilka lagu sii joogo si sharci darro ah.
Hadalkan ayaa kusoo aadaya xilli uu sii xoogeysanayo khilaafka siyaasadeed ee u dhexeeya Dowladda Federaalka iyo qaar ka mid ah dowlad-goboleedyada, gaar ahaan arrimaha la xiriira dastuurka cusub iyo hannaanka doorashooyinka.
Maamulka Puntland oo qayb ka ah Golaha Mustaqbalka Soomaaliyeed, oo ay ku mideysan yihiin siyaasiyiinta mucaaradka iyo Jubaland, ayaa si adag uga soo horjeeda dastuurka cusub ee ay meel-marisay Dowladda Federaalka, kaas oo dhigaya in muddo xileedka hay’adaha dowladda laga dhigo shan sano.
Dhanka kale, Dowladda Federaalka ayaa ku adkeysaneysa dastuurka cusub, iyadoo mucaaradka ay ku tilmaameen tallaabadaas mid u muuqata muddo kororsi aan sharciyad buuxda lahayn.
Wararka ayaa sidoo kale sheegaya in mucaaradka iyo xulafadooda ay wadaan dadaallo ay beesha caalamka ugu qancinayaan in dalka loo baahan yahay hannaan doorasho oo lagu heshiiyo, si looga hortago qalalaase siyaasadeed.
Si kastaba, xaaladda siyaasadeed ee Soomaaliya ayaa sii galeysa marxalad adag, iyadoo dhaq-dhaqaaqyo cusub oo mucaaradku wadaan la filayo inay saameyn ku yeeshaan jihada mustaqbalka dalka.
