Wararka24: Siyaasiyiinta mucaaradka somaaliya ayaa kulan la yeeshay odayaasha dhaqanka beelaha Hawiye, kadibna ku dhawaaqay qorshe ay ugu magac dareen “Badbaado Qaran”. Kulanka ayaa ka dhacay hoyga madaxweynihii hore Sheekh Shariif Sheekh Axmed ee magaalada Muqdisho.
Ra’iisul wasaarihii hore Maxamed Xuseen Rooble ayaa sheegay in kulanka lagu falanqeeyay xaaladda siyaasadeed ee dalka. Wuxuu xusay in muddo xileedka Baarlamaanka uu dhammaaday, isla markaana uu dhow yahay dhammaadka waqtiga Madaxweynaha.
Rooble ayaa tilmaamay in dalka uu wajahayo marxalad kala guur ah oo xasaasi ah, isagoo sheegay in ay jirto hubanti la’aan ku saabsan jihada siyaasadeed. Wuxuu sheegay in mucaaradku ay odayaasha la wadaageen walaaca ka jira doorashooyinka iyo xaaladda guud.
Mucaaradka ayaa ku dhawaaqay in loo baahan yahay “Badbaado Qaran” oo ay ka qayb qaataan dhammaan bulshada Soomaaliyeed. Waxay ugu baaqeen shacabka inay door muuqda ka qaataan dadaallada lagu xallinayo xaaladda.
Rooble ayaa sheegay in ay hore ula hadleen Madaxweynaha Xasan Sheekh Maxamuud si xal looga gaaro khilaafaadka jira, balse uu sheegay in weli la isku mari la’yahay arrimaha muhiimka ah. Wuxuu ka digay in dalka uu geli karo xaalad adag haddii aan la helin is-afgarad.
Kulankan ayaa kusoo aadaya xilli ay weli taagan tahay muranka ku saabsan hannaanka doorashooyinka iyo wax ka beddelka dastuurka. Dhaqdhaqaaqyada mucaaradka ee Muqdisho ayaa sii xoogeysanaya maalmihii u dambeeyay.
Xaaladda siyaasadeed ee dalka ayaa weli ah mid xasaasi ah, iyadoo dhinacyada kala duwan ay isku dayayaan inay helaan xal mideeya aragtiyahooda ku saabsan mustaqbalka siyaasadda Soomaaliya.
