Wararka24: Xubnaha mucaaradka Soomaaliya ee kasoo horjeeda Madaxweynaha Xasan Sheekh Maxamuud ayaa lagu wadaa inay caawa yeeshaan shir xasaasi ah oo ay uga arrinsanayaan xaaladda siyaasadeed ee cakiran ee dalka.
Ilo wareedyo lagu kalsoon yahay ayaa xaqiijiyay in siyaasiyiintan ay isugu tegi doonaan guriga madaxweynihii hore Shariif Sheekh Axmed ee magaalada Muqdisho, halkaas oo ay ku yeelanayaan kulan wadatashi ah.
Shirkan ayaa la filayaa in diiradda lagu saaro marxaladda kala guurka ah ee uu galay dalka, gaar ahaan kadib dhammaadka muddo xileedka Baarlamaanka Federaalka Soomaaliya oo ku ekaa 14-ka April 2026.
Wararka ayaa tilmaamaya in mucaaradka ay soo saari doonaan go’aanno muhiim ah oo ku saabsan sida loo wajahayo xaaladda siyaasadeed, iyagoo hore uga digay halista firaaq dastuuri ah iyo hubanti la’aan.
Sidoo kale, waxaa kulanka lagu falanqeyn doonaa qodobadii kasoo baxay shirkii hore ee Nairobi iyo tallaabooyinka xiga ee ay qaadi doonaan ee la xiriira dowladda federaalka.
Madaxweynaha Soomaaliya ayaa waxaa ka haray muddo ku dhow 30 maalmood, iyadoo aan weli la gaarin heshiis rasmi ah oo ku saabsan hannaanka doorashooyinka, taas oo sii kordhisay xiisadda siyaasadeed.
Xubnaha ka qeyb-galaya shirka ayaa inta badan ka socda Muqdisho, waxaana la sheegay inay qaadanayaan masuuliyad dheeri ah marka loo eego xubnaha kale ee mucaaradka.
Dhaqdhaqaaqyadan ayaa kusoo aadaya xilli ay sii xoogeysaneyso hubanti la’aanta doorashooyinka iyo muranka ka taagan wax ka beddelka dastuurka, iyadoo mucaaradka iyo maamul-goboleedyada qaar ay si adag uga horjeedaan qorshaha dowladda.
Si kastaba, Soomaaliya ayaa wajahaysa marxalad xasaasi ah oo u baahan xal siyaasadeed oo degdeg ah si looga fogaado qalalaase hor leh.
