Wararka24: Madaxweynaha Soomaaliya Xasan Sheekh Maxamuud iyo wafdi uu hoggaaminayo ayaa u ambabaxay dalka Mareykanka, halkaas oo uu uga qeybgalayo kulamada heerka sare ee kalfadhiga 81-aad ee Golaha Guud ee Qaramada Midoobay.
Doodda guud ee Golaha Guud ayaa ka bilaabanaysa magaalada New York 22-ka Sebtembar, iyadoo madaxda iyo wakiillada dalalka xubnaha ka ah Qaramada Midoobay ay khudbado ka jeedin doonaan fadhiyada guud.
Madaxweyne Xasan Sheekh ayaa la filayaa inuu inta uu New York joogo kaga hadlo xaaladda Soomaaliya iyo arrimaha mudnaanta u leh dowladda, oo ay ku jiraan amniga, dagaalka lagula jiro Al-Shabaab, xoojinta ciidamada qaranka iyo taageerada caalamiga ah ee Soomaaliya.
Dowladda Federaalka Soomaaliya ayaa sidoo kale dooneysa inay madasha caalamiga ah kusoo bandhigto xaaladda bani’aadamnimo ee dalka iyo baahida loo qabo in la kordhiyo taageerada iyo maalgashiga caalamiga ah, xilli Soomaaliya ay wajahdo caqabado amni, dhaqaale iyo bani’aadamnimo.
Madaxweynaha ayaa sidoo kale la filayaa inuu ka qeyb galo kulamo iyo shirar gaar ah oo ka dhacaya New York, kuwaas oo uu kula kulmi doono madaxda dalalka kale, saraakiisha Qaramada Midoobay iyo mas’uuliyiin Mareykan ah.
Safarka ayaa kusoo beegmaya xilli Soomaaliya ay xubin aan joogto ahayn ka tahay Golaha Ammaanka ee Qaramada Midoobay, taasoo dowladda u saamaxaysa inay si toos ah uga qeybqaadato doodaha iyo go’aannada la xiriira nabadda iyo amniga caalamka.
Madaxweyne Xasan Sheekh ayaa horey uga qeybgalay kulamadii Qaramada Midoobay, iyadoo khudbaddiisii kalfadhigii 80-aad ay diiradda saartay arrimo ay ka mid yihiin nabadda, amniga, horumarka iyo doorka Soomaaliya ee iskaashiga caalamiga ah.
Inta uu socdo booqashadiisa New York, dowladda Soomaaliya waxay sidoo kale dooneysaa inay xoojiso xiriirrada diblomaasiyadeed iyo taageerada caalamiga ah ee ajandayaasheeda amni, dhaqaale iyo bani’aadamnimo.
