Wararka24: Madaxweynaha Koonfur Galbeed Cabdicasiis Xasan Maxamed Lafta-gareen ayaa maanta dib loogu doortay xilka madaxweynaha maamulkaas, kadib doorasho ka dhacday magaalada Baydhaba ee xarunta gobolka Baay.
Xildhibaannada Baarlamaanka saddexaad ee Koonfur Galbeed ayaa mar kale doortay Lafta-gareen, waxaana la tartamay Cabdulaahi Xaaji Xasan oo ahaa musharraxa kale ee la soo bandhigay.
Guddiga doorashada ayaa shaaciyay in Cabdicasiis Lafta-gareen uu helay 66 cod, taas oo u sahashay inuu sii hayo xilka madaxweynaha.
Doorashadan ayaa ku soo aadaysa kadib markii isla maanta xildhibaannadu dib u doorteen guddoomiyaha Baarlamaanka, iyadoo Cali Siciid Fiqi mar kale loo doortay hoggaanka golaha.
Sidoo kale, Shamsa Maxamed Yarow ayaa loo doortay guddoomiye ku xigeenka labaad, kadib doorasho ka dhacday gudaha Baydhabo.
Dhanka kale, mucaaradka Koonfur Galbeed iyo Dowladda Federaalka Soomaaliya ayaa diidan doorashadan, iyagoo ku tilmaamay mid aan loo dhammayn.
Wararka ayaa sheegaya in dhaqdhaqaaqyo ciidan ay ka socdaan degmada Buurhakaba, kuwaas oo kusoo wajahan Baydhabo, si ay uga hortagaan xaaladda taagan.
Xiisadda ayaa weli kacsan, iyadoo laga cabsi qabo isku dhacyo ciidan oo ka dhaca gobolka Baay.
