NAIROBI — Wasiirka Arrimaha Gudaha Kenya Kipchumba Murkomen ayaa ku dhawaaqay isbeddello cusub oo lagu samaynayo dhammaan saldhigyada booliiska dalka.
Isbeddelada ugu muhiimsan waxaa ka mid ah in kamaradaha CCTV lagu rakibo 1,209 saldhig oo booliis ah muddo laba sano gudahood guud ahaan dalka kenya. Sarkaalada saldhigyada ayaa mas’uul ka noqon doona ilaalinta iyo kawarqabka kamerooyinka.
Murkomen wuxuu sheegay inuu baarlamaanka kenya u soo gudbin doono sharci cusub. Sharciga cusub wuxuu dembi ka dhigayaa qofka tirtira ama wax yeela kamaradaha CCTV. Sarkaalka saldhiggu waa inuu ka warbixiya hadii hal saac kali ah kameradu shaqada joojiso.
Dhammaan saldhigyada ayaa lagu faray inay buugaagta dhacdooyinka ka dhigaan kuwo dijital ah. Tani waxay ka hortagaysaa in qof beddelo ama tirtiro warbixinta dhacdooyinka.
Wasiirku wuxuu amray in booliiska oo dhan ay qaataan tababar cusub. Sanad kasta waa inay qaataan tababar joogto ah si loo soo celiyo xirfadnimada iyo nidaamka booslika.
Booliiska ayaa sidoo kale la doonayaa inay la shaqeeyaan bulshada. Ujeedadu waa in la wanaajiiyo xiriirka ka dhexeeya booliiska iyo dadka ay u adeegaan.
Baaritaan joogto ah ayaa lagu samayn doonaa saldhigyada si loo hubiyo sida booliiska ay u shaqeynayaan. Hay’ado madaxbannaan ayaa samayn doona baaritaankan.
Isbeddelada cusub ayaa timid kadib dilka Albert Ojwang oo ku dhintay xabsiga booliiska. IPOA waxay sheegtay in muuqaalka CCTV uu maqan yahay saldhigga Central Police Station.
Warbixinta isbitaalka Mbagathi ayaa muujisay in Ojwang uu meyd ahaa markii la keenay. Booliiska ayaa sheegay inuu madaxa ku dhuftay derbiga xabsiga.
Murkomen wuxuu sheegay in la hirgelin doono isbeddelada cusub si degdeg ah.