Wararka25: 23-02-2026 Ra’iisul Wasaaraha Itoobiya, Abiy Axmed, ayaa ku dhawaaqay in dalkiisa aan badda lahayn uu ballaariyay tababarrada ciidamada si loogu daro hawlgallada bada, isaga oo sheegay in tallaabadan looga golleeyahay la-dagaallanka burcad-badeedda iyo kooxaha halista amni ee ka jira marinka Badda Cas.
Abiy ayaa hadalkan ka jeediyay munaasabad ka dhacday magaalada Hawaasa, halkaas oo uu ku sheegay in ciidamada Itoobiya ay diyaarinayaan awood badeed oo difaac ah, isla markaana ay ka shaqayn doonaan sugidda amniga marinnada ganacsiga ee u dhexeeya cirifka Soomaaliya illaa dekedda Massawa ee Ereteriya. Waxa uu xusay in Itoobiya ay la shaqayn doonto dalalka deriska ah si loo xaqiijiyo nabad-gelyada gobolka.
Taliyaha Ciidamada Qalabka Sida ee Itoobiya, Field Marshal Beraanu Jula, ayaa sheegay in ciidamadu dib u habayn ku sameeyeen qaab-dhismeedkooda tababar iyo qalab, si ay u yeeshaan awood hawlgallo isku dhafan, inkasta oo dalku uusan lahayn xeebo badeed. Mas’uuliyiinta Itoobiya ayaa carrabka ku adkeeyay in ujeeddadu tahay diyaar-garow difaac oo kaliya.
Ku dhawaaqistan ayaa ku soo beegantay xilli Itoobiya ay si weyn ugu tiirsan tahay dekedaha dalalka dariska ah tan iyo markii ay weysay marin badeed 1993-kii. Xiisado diblomaasiyadeed oo horay u soo dhex maray Itoobiya iyo Soomaaliya kaddib heshiis muran dhaliyay oo lala galay Somaliland ayaa hoos u dhacay kadib wada-hadallo ay dhexdhexaadisay Turkiga, iyadoo labada dhinac ay muujiyeen isu soo dhawaansho ku aaddan helitaanka marin ganacsi oo sharci ah.
Dhanka kale, hadallada Abiy ee ku saabsan gaarsiinta aagga amniga dekedda Massawa ayaa imanaya xilli xiriirka Itoobiya iyo Ereteriya uu mar kale muujinayo xasaasiyad, kaddib eedeymo is-dhaafsi ah oo ku saabsan xadgudubyo xuduudeed. Itoobiya ayaa sheegtay in himiladeeda badda ay ku raadinayso waddo diblomaasiyadeed, iyadoo mar kale ku celisay in aysan doonayn in arrintaasi keento iska horimaad milatari.
