Wararka24: Boqortooyada Midowday (UK) ayaa oggolaatay codsi rasmi ah oo Sacuudiga uu ku dalbaday taageero militari oo difaac ah, iyadoo London ay qorsheyneyso inay u dirto hal diyaarad oo nooca RAF Voyager ah si ay shidaal hawada ugu siiso diyaaradaha dagaalka Sacuudiga.
Ra’iisul Wasaaraha UK Andy Burnham ayaa sheegay in go’aanka la gaaray kadib markii dowladda Sacuudiga ay codsatay taageero militari, iyadoo talo laga qaatay Wasiirka Difaaca iyo Wasiirka Arrimaha Dibadda. Taageerada ayaa la filayaa inay bilaabato maalmaha soo socda, waxaana markii hore loo qorsheeyay muddo kooban oo dhowr toddobaad ah.
Diyaaradda RAF Voyager ayaa laga hawlgelin doonaa Saldhigga Ciidanka Cirka ee RAF Akrotiri ee Qubrus. Hawsha diyaaraddan ayaa ah inay shidaal hawada ugu shubto diyaaradaha dagaalka Sacuudiga, si ay uga caawiso inay sii wataan howlgallada difaaca ee ka dhanka ah gantaallada iyo diyaaradaha aan duuliyaha lahayn ee Xuutiyiinta.
Burnham ayaa sheegay in taageerada UK ay qeyb ka tahay dadaallada lagu ilaalinayo xasilloonida gobolka iyo amniga marinnada muhiimka ah ee ganacsiga iyo tamarta. Wuxuu sidoo kale xusay walaaca laga qabo saameynta colaadaha gobolka ku yeelan karaan qiimaha maciishadda iyo dhaqaalaha Britain.
Go’aanka London ayaa kusoo beegmaya xilli Xuutiyiinta Yemen ay kordhiyeen weerarrada ay ku sheegayaan inay ku qaadayaan bartilmaameedyo ku yaalla gudaha Sacuudiga. Reuters ayaa sheegtay in Xuutiyiintu dhowaan sheegteen weerarro gantaallo iyo diyaarado aan duuliye lahayn oo lagu bartilmaameedsaday Riyadh iyo goobo tamareed, halka Sacuudigu uu sheegay inuu qabtay qaar ka mid ah weerarradaas.
Xuutiyiinta ayaa sidoo kale toddobaadyadii lasoo dhaafay qabsaday goobo istaraatiiji ah oo ku dhow xeebaha Badda Cas iyo Bab al-Mandab, taasoo sare u qaaday walaaca laga qabo amniga maraakiibta iyo sahayda tamarta ee gobolka. Isbeddelladaas ayaa sidoo kale saameyn ku yeeshay waddooyinka dhoofinta shidaalka Sacuudiga.
Taageerada cusub ee UK waxay ku soo beegmaysaa iyadoo labada dal ay muddo dheer lahaayeen iskaashi dhanka difaaca ah. UK ayaa sidoo kale horey uga qeybqaadatay hawlgallo militari oo ka dhan ah bartilmaameedyada Xuutiyiinta ee Yemen, gaar ahaan weerarradii ay ciidamada Mareykanka iyo UK fuliyeen Janaayo 2024.
Dhanka kale, wasiirrada arrimaha dibadda ee dalalka G7 ayaa 21-kii Sebtembar ku baaqay in Iran ay joojiso taageerada iyo hubeynta Xuutiyiinta, iyagoo sheegay in weerarrada kooxda ay kordhinayaan khatarta amni ee gobolka iyo ganacsiga caalamiga ah.
