Wararka24: Wararka ka imanaya Iiraan ayaa sheegaya in diyaarad dagaal oo Mareykan leeyahay lagu soo riday gudaha dalkaas, iyadoo weli la raadinayo shaqaalihii la socday.
Telefishinka dowladda Iiraan ayaa sheegay in nidaamka difaaca cirka ee Ciidamada Ilaalada Kacaanka uu bartilmaameedsaday diyaaradda, isla markaana la helay burburkeeda.
Wakaaladaha wararka ee dalkaas ayaa sidoo kale baahiyay sawirro la sheegay inay muujinayaan haraadiga diyaaradda la soo riday.
Mas’uuliyiin Iiraani ah ayaa ugu baaqay dadka deegaanka inay soo qabtaan duuliyeyaasha diyaaradda, iyagoo ballan qaaday abaalmarin.
Dhacdadan ayaa imanaysa xilli dagaal xooggan uu socdo tan iyo dhammaadka bisha Febraayo, iyadoo duqeymo badan ay fuliyeen Mareykanka iyo Israel.
Si kastaba, Mareykanka ayaa hore u beeniyay warar la mid ah, isagoo sheegay in dhammaan diyaaradaha uu leeyahay ay badqabaan.
Ilaa hadda lama helin xaqiijin madax bannaan oo ku saabsan sheegashada Iiraan, waxaana weli socda xog uruurin la xiriirta dhacdadan.
