Wararka24: Guddoomiyaha Bangiga Dhexe ee Iiraan, Abdolnaser Hemmati, ayaa sheegay in dalka uu haysto kayd lacag qalaad oo ku filan in lagu sii wado maalgelinta waxyaabaha daruuriga ah ee dibadda laga soo dejiyo, iyadoo bangigu Dhexe ee Iiran u diyaar u yahay inuu suuqa ku shubo ilaa $2 bilyan si loo xasiliyo lacagta dalka ee riyaalka.
Hemmati ayaa sheegay in Bangiga Dhexe uu heli karo ilo kala duwan oo lacag qalaad ah, kuwaas oo ay ka mid yihiin dakhliga ka soo xarooda dhoofinta saliidda iyo badeecadaha aan saliidda ahayn. Waxa kale oo uu sheegay in bangigu haysto kayd lacageed ayna cunaqabateynta Mareykanka si toos ah u saameyn karin.
Sida uu sheegay, in ka badan $18 bilyan oo lacag qalaad ah ayaa la bixiyay tan iyo 21-kii Maarso, oo ah bilowga sannadka cusub ee Iiraan, si loogu maalgeliyo soo dejinta waxyaabaha muhiimka ah. Lacagtaas ayaa lagu taageeray soo dejinta cuntada, daawooyinka, quudinta xoolaha iyo agabka ceeriinka ah ee warshadaha.
Maamulka Bangiga Dhexe ee Iiran oo a’ad u sareysa
Bangiga Dhexe ayaa toddobaadkii hore sidoo kale suuqa sarrifka lacagaha qalaad geliyay $500 milyan, sida uu sheegay Hemmati. Wuxuu sheegay in tallaabadan iyo tallaabooyin kale oo la qaadi karo ay qayb ka yihiin dadaallada lagu yareynayo cadaadiska saaran suuqa lacagaha.
“Bangiga Dhexe wuxuu diyaar u yahay, haddii loo baahdo, inuu suuqa ku shubo ilaa $2 bilyan oo lacag qalaad ah si loo maareeyo loona xasiliyo suuqa,” ayuu yiri Hemmati.
Hadallada guddoomiyaha ayaa yimid xilli ay sii kordhayaan walaacyada ku saabsan xaaladda dhaqaale ee Iiraan iyo saameynta cunaqabateynta Mareykanka. Xoghayaha Maaliyadda Mareykanka, Scott Bessent, ayaa sheegay in cadaadiska dhaqaale uu si weyn u saameynayo Iiraan.
Hemmati ayaa qiray in cunaqabateynta iyo saameynta dhaqaale ee dagaalladu ay nolosha maalinlaha ah ku adkeeyeen shacabka Iiraan, balse wuxuu diiday saadaasha ah in dhaqaalaha dalka uu burbur ku jiro. Wuxuu sheegay in xaaladdu adag tahay, laakiin aanu jirin burbur dhaqaale oo dhacay.
Guddoomiyaha Bangiga Dhexe ayaa sidoo kale sheegay in siyaasadaha lacagta iyo kormeerka dhaqaale ee bangiga ay gacan ka geysteen xakamaynta xawaaraha kororka qiimaha. Sida uu sheegay, istaraatiijiyadda hadda jirta ayaa ah in la yareeyo xawaaraha sicir-bararka, si marka xaaladdu degto uu hoos ugu dhaco heerka sicir-bararka.
Riyaalka Iiraan ayaa bishii Agoosto gaaray heerkii ugu hooseeyay marka loo eego doollarka Mareykanka, iyadoo qiimihiisu dhaafay 2 milyan oo riyaal halkii doollar. Sicir-bararka sannadlaha ah ayaa sidoo kale bishii Luulyo gaaray 66 boqolkiiba, taas oo sii kordhisay cadaadiska dhaqaale ee saaran qoysaska iyo ganacsiyada dalka.
