Wararka24: Fahiima Yuusuf Cabdullaahi (Quuje), oo hore uga tirsaneyd Baarlamaanka Waqooyi Bari, ayaa maanta gaartay magaalada Hargeysa, maalmo kadib markii ay ku dhawaaqday inay iska casishay xubinnimadii baarlamaanka maamulkaas, isla markaana ay sheegtay inay ka tanaasushay aragtidii Soomaali-weyn.
Garoonka diyaaradaha ee Hargeysa waxaa ku soo dhaweeyay mas’uuliyiin ka tirsan Somaliland, oo ay ku jiraan Guddoomiyaha Golaha Wakiillada Yaasiin Xaaji Maxamuud Xiir (Faratoon), Wasiirka Arrimaha Gudaha iyo xubno kale oo ka tirsan dowladda, iyo dadweyne halkaas isugu yimid.
Markii ay gaartay Hargeysa, Fahiima Quuje ayaa warbaahinta u sheegtay inay ku faraxsan tahay dib ugu laabashada magaalada kadib muddo lix sano ah. Waxay sheegtay inay hore uga maqneyd cabashooyin iyo tabashooyin la xiriiray xaaladda deegaannada ay ka soo jeeddo, isla markaana ay hadda go’aansatay inay dib ugu soo laabato Somaliland.
Fahiima ayaa sidoo kale ku celisay mowqifkeeda siyaasadeed ee ay hore u shaacisay, iyadoo sheegtay inay dib ugu biirtay Somaliland. Hadalladeeda ayaa si weyn looga hadal hayaa gudaha iyo dibadda deegaannada ay arrintu khuseyso.
Dhanka kale, maamulka Waqooyi Bari ayaa hore uga horyimid go’aanka ay qaadatay Fahiima Quuje. Baarlamaanka maamulkaas ayaa ka qaaday xasaanaddii xildhibaannimo, halka Xafiiska Xeer Ilaaliyaha Guud uu sheegay inay wajahdo baaritaan iyo eedo la xiriira qiyaano qaran.
Go’aanka Fahiima Quuje ayaa sii kordhiyay doodaha siyaasadeed ee ku saabsan mustaqbalka gobollada Sool, Sanaag iyo Cayn, iyadoo dhinacyada kala duwan ay weli ka bixinayaan aragtiyo is khilaafsan oo ku saabsan tallaabada ay qaaday.
