Wararka24: Wasaaradda Arrimaha Gudaha ee Dowladda Federaalka Soomaaliya ayaa faah-faahin ka bixisay sababta maamulka Waqooyi Bari uga maqnaaday mashruuca Bulsho, oo ah barnaamij horumarineed ayna maalgelinayso World Bank, kaas oo ku kacaya 35 milyan oo dollar.
Mashruucan oo si rasmi ah loo daahfuray 27-ka Abriil ayaa lagu sheegay mid loogu talagalay xoojinta bulshada iyo hay’adaha maxalliga ah, si loo horumariyo wadajirka bulshada, ka-qaybgalka loo dhan yahay iyo adkaysiga deegaanada fog-fog ee adeegyada ka fog.
Wasaaradda ayaa sheegtay in sababta ugu weyn ee Waqooyi Bari looga reebay wejiga koowaad ay tahay in qorsheynta mashruucu ay bilaabatay ka hor dhismaha maamulkaas. Sida lagu sheegay war-saxaafadeedka, diyaarinta mashruuca waxay soo bilaabatay bishii May 2023, halka wada-tashiyadii dowlad-goboleedyadana la sameeyay bishii May 2024.
Kulankii ugu dambeeyay ee dhammeystirka mashruuca ayaa la qabtay bishii February 2025 magaalada Nairobi, xilli maamulka Waqooyi Bari aan weli si rasmi ah loo dhisin. Dowladda ayaa xustay in dhismaha maamulka cusub la soo gabagabeeyay 30-kii August 2025.
Wasaaradda Arrimaha Gudaha ayaa sheegtay inay hadda ku howlan tahay sidii maamulka Waqooyi Bari loogu dari lahaa wejiyada dambe ee mashruuca iyo barnaamijyada kale ee la midka ah.
Mashruuca Bulsho ayaa la filayaa inuu ka hirgalo dowlad-goboleedyadii ka qayb qaatay diyaarintiisa, iyadoo mid kasta loo qoondeeyay 5 milyan oo dollar si loo fuliyo qorshayaasha horumarineed ee bulshada. Dowladda Federaalka ayaa sheegtay in mashruucan uu muhiim u yahay xoojinta dowladnimada hoose iyo horumarinta adeegyada bulshada.
