Wararka24: Guddiga Madaxa-bannaan ee Doorashooyinka Qaranka iyo Soohdimaha (GMDQS) ayaa ku dhawaaqay in dib loo dhigay doorashada goleyaasha deegaanka iyo Golaha Wakiillada ee Dowlad-goboleedka Galmudug, iyadoo la soo saaray jadwal cusub oo lagu qabanayo doorashada.
War-saxaafadeed uu guddigu soo saaray ayaa lagu sheegay in go’aanka dib-u-dhigista la gaaray kaddib markii la qiimeeyay heerka diyaar-garowga howlaha doorashada, isla markaana la tixgeliyay codsiyo ay soo gudbiyeen ururrada siyaasadda oo dalbaday waqti dheeraad ah si ay u dhammaystiraan diyaar-garowgooda.
Sida jadwalka cusub, qabashada codsiyada musharraxiinta ayaa sii socon doonta illaa 25-ka Luulyo 2026, halka doorashada loo asteeyay inay qabsoonto 30-ka Luulyo 2026.
Guddigu wuxuu ugu baaqay dhammaan ururrada siyaasadda, musharraxiinta iyo dhinacyada kale ee ku lug leh geeddi-socodka doorashada inay ka faa’iideystaan muddada dheeriga ah si loo xaqiijiyo doorasho u dhacda si xor, xalaal ah oo waafaqsan sharciga.
War-saxaafadeedka ayaa sidoo kale lagu sheegay in guddigu sii wadi doono wada-shaqeynta uu la leeyahay dhammaan daneeyayaasha si loo dhammaystiro diyaar-garowga lagama maarmaanka ah loona xaqiijiyo qabsoomidda doorashada Galmudug sida ku cad jadwalka cusub.
