Wararka24: Hay’adda Ammaanka Badaha ee Boqortooyada Ingiriiska ee UKMTO ayaa ka digtay kororka weerarrada iyo afduubyada ay geysanayaan burcad-badeedda Soomaalida, iyadoo la sheegay in ugu yaraan saddex markab ay hadda gacanta ku hayaan kooxahaasi.
Warbixinta ayaa lagu sheegay in maraakiibta la afduubtay intii u dhexeysay 21-kii Abriil illaa 2-dii May, islamarkaana labo kamid ah ay sideen shidaal halka mid kale uu watay shamiinto. Mid kamid ah maraakiibta ayaa laga qafaashay xeebaha Yemen kadibna loo wareejiyay dhinaca Soomaaliya.
Arrintan ayaa sare u qaaday walaaca ku saabsan suuragalnimada in xiriir ama iskaashi uu dhex maro burcad-badeedda Soomaalida iyo kooxda Xuutiyiinta Yemen ee taageerada ka hela Iran. Siyaasiyiin iyo falanqeeyayaal ayaa sheegay in colaadaha ka jira Bariga Dhexe ay abuureen fursado cusub oo ay kooxahaasi uga faa’iideysan karaan xaaladda amni darrada ah.
Xildhibaan Maxamed Diini oo ka tirsan Baarlamaanka Soomaaliya ayaa sheegay in dib-usoo-noqoshada burcad badeednimada ay xiriir la leedahay xaaladaha amni ee gobolka iyo isbeddelada ku yimid marinnada maraakiibta caalamiga ah. Wuxuu sidoo kale ka digay in kooxaha burcad-badeedda ay xiriir la sameyn karaan Xuutiyiinta Yemen.
Ciidanka Badda ee Midowga Yurub ayaa sheegay inay rumeysan yihiin in saddex kooxood oo burcad-badeed ah ay hadda ka howlgalaan waqooyiga Soomaaliya, kuwaas oo leh taageero dhinaca berriga iyo badda ah. Hay’addu waxay sheegtay in khatarta burcad-badeednimadu ay weli sareyso xeebaha Soomaaliya iyo marinnada muhiimka ah ee badweynta.
Dhanka kale, khubaro dhanka amniga ah ayaa sheegay in xiisadaha ka taagan Bariga Dhexe ay sabab u noqdeen in ciidamada caalamiga ah qaarkood ay diiradda saaraan ilaalinta marinka Bab al-Mandab, taas oo hoos u dhigtay dadaalladii lagula dagaallamayay burcad-badeedda Soomaalida.
Soomaaliya iyo Yemen ayaa wadaaga xuduud badeed dheer, taas oo sii kordhisay walaaca laga qabo in kooxaha hubeysan ee labada dhinac ay yeeshaan xiriir amni iyo iskaashi halis ku noqon kara ganacsiga caalamiga ah iyo maraakiibta isticmaasha Badda Cas iyo Badweynta Hindiya.
