Wararka24: 26-01-2026 Dowladda Federaalka Soomaaliya ayaa faahfaahin ka bixisay tallaabooyinka ay qaadday kaddib markii Mareykanku hoos u dhigay kaalmadii shisheeye ee uu siin jiray, iyadoo sheegtay inay la qabsaneyso duruufaha cusub isla markaana yareyneyso saameynta ka dhalan karta.
Wasiiru Dowlaha Arrimaha Dibadda Soomaaliya, Cali Cumar (Cali Balcad), ayaa sheegay in inkastoo ay jirto dhimista gargaarka, haddana Mareykanku weli dano istiraatiiji ah ku leeyahay Soomaaliya, gaar ahaan iskaashiga dhinaca amniga iyo la-dagaallanka Al-Shabaab iyo kooxda Daacish.
“Waan ognahay isbeddelkan, waxaana isku dayeynaa inaan la qabsanno,” ayuu yiri Cali Balcad oo wareysi siiyay wargeyska Al-Majalla. Wuxuu xusay in dhimista kaalmada Mareykanka aysan ku koobnayn Soomaaliya oo keliya, balse ay qeyb ka tahay dib-u-qiimeyn ballaaran oo Washington ku sameyneyso barnaamijyada gargaarka caalamiga ah.
Soomaaliya ayaa xilligan wajahaysa caqabado dhowr ah oo ay ka mid yihiin ilaalinta horumarka amni, u diyaargarowga doorashooyinka soo socda, iyo ka jawaabista xaaladaha bani’aadannimo sida abaaraha, fatahaadaha, barakaca iyo cunto-yaraanta.
Sanadkii la soo dhaafay, Mareykanka ayaa adkeeyay siyaasaddiisa kaalmada shisheeye, iyadoo barnaamijyo badan la geliyay dib-u-eegis, hakad ama isbeddel qaab-hawleed. Arrintan ayaa gudaha Soomaaliya saameyn ku yeelatay qeybo ka mid ah gargaarka bani’aadannimo iyo adeegyada horumarinta.
Bilowgii Janaayo 2026, Waaxda Arrimaha Dibadda Mareykanka ayaa ku dhawaaqday in la xayiray kaalmooyin gaar ah oo la siin jiray Dowladda Federaalka, kaddib eedeymo la xiriiray waxyeello loo geystay xarun ay taageerto Hay’adda Cunnada Adduunka (WFP) iyo leexin gargaar. Dowladda Soomaaliya ayaa si cad u beenisay eedeymahaas, iyadoo sheegtay in gargaarku weli gacanta ugu jiro Qaramada Midoobay.
Dhanka kale, Cali Balcad ayaa ammaanay taageeradii hore ee Mareykanka ee dhismaha dowladnimada iyo waaxda amniga, wuxuuna sheegay in hay’adaha dowladda ay hadda diyaarinayaan qorshayaal ay kula qabsadaan xilli ay yaraan karto maalgelinta dibadda, iyagoo ilaalinaya barnaamijyada muhiimka ah.
Wasiirku wuxuu sidoo kale diiday aragtida ah in jiritaanka Al-Shabaab iyo kooxaha xiriirka la leh Daacish ay caddeyn u tahay fashil dowladeed. Wuxuu ku dooday in awoodda dowladdu ay si tartiib ah u soo hagaagtay tan iyo burburkii 1991-kii, isla markaana kooxaha hubeysan aysan hadda gacanta ku hayn dhul ballaaran sida hore.
Iskaashiga milateri ee u dhexeeya Mareykanka, ciidamada Soomaaliya iyo saaxiibadooda ayaa weli socda, iyadoo ay jiraan howlgallo wadajir ah oo lagu wiiqayo awoodda Al-Shabaab. Cali Balcad ayaa carrabka ku adkeeyay in inkastoo ay isbeddelayaan siyaasadaha gargaarka shesheeye, haddana Mareykanku uusan ka tanaasulin danaha amni ee Soomaaliya.
“Qaabka wax u socda ayaa laga yaabaa inuu is beddelo,” ayuu yiri, “laakiin taasi macnaheedu ma aha in Mareykanku ka baxayo Soomaaliya.”
