Wararka24: Qaar ka mid ah dalalka xubnaha ka ah Midowga Afrika ayaa sheegay in Howlgalka Taageerada iyo Xasilinta Midowga Afrika ee Soomaaliya (AUSSOM) uusan sii socon karin muddo aan xad lahayn, iyagoo ugu baaqay Dowladda Federaalka Soomaaliya inay dardargeliso diyaarinta ciidamada qaranka si ay ula wareegaan mas’uuliyadda amniga dalka.
Sida lagu sheegay warbixin uu daabacay The East African, dalalka Cameroon iyo Gabon ayaa muujiyay in howlgal kasta oo nabad ilaalin ahi uu leeyahay dhammaad, ayna muhiim tahay in Soomaaliya isu diyaariso maalinta ay ciidamada shisheeye ka baxayaan dalka.
Dooddan ayaa ku soo beegmaysa iyadoo ay sii kordhayaan walaacyada la xiriira maalgelinta howlgalka AUSSOM, kaddib markii Mareykanku muujiyay inuu ka soo horjeedo sii wadista taageerada Qaramada Midoobay ee howlgalka laga bilaabo sannadka 2027. Arrintaas ayaa abuurtay shaki ku saabsan mustaqbalka howlgalka iyo sida loo sii maalgelin doono.
Warbixintu waxay xustay in dalalka xubnaha ka ah Midowga Afrika ay hadda ka doodayaan sidii loo dejin lahaa qorshe cad oo Soomaaliya si tartiib tartiib ah ugu wareegeyso mas’uuliyadda amniga, iyadoo la tixgelinayo caqabadaha dhaqaale iyo kuwa amni ee weli horyaalla howlgalka.
Howlgalka AUSSOM ayaa billowday sannadkii 2025, isagoo beddelay ATMIS. Ujeeddadiisu waa taageeridda ciidamada ammaanka Soomaaliya iyo xasilinta deegaannada laga saaray Al-Shabaab, iyadoo qorshuhu yahay in mas’uuliyadda amniga si tartiib tartiib ah loogu wareejiyo ciidamada Soomaaliyeed marka ay yeeshaan awood buuxda oo ay ula wareegaan sugidda amniga dalka.
