Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa maanta gaaray magaalada Dhuusamareeb, halkaas oo uu uga qeyb galayo xafladda caleemo saarka hoggaanka cusub ee Galmudug.
Madaxweynaha iyo wafdiga uu hoggaaminayo ayaa si diirran u soo dhaweeyay hoggaamiyaha cusub ee Galmudug, Liibaan Axmed Xasan.
Sidoo kale magaalada waxaa maanta gaaray Ra’iisul Wasaaraha Xukuumadda Federaalka, Xamza Cabdi Barre, iyo Guddoomiyaha Golaha Shacabka, Cabdulqaadir Maxamed Nuur (Jaamac).
Xafladda ayaa la filayaa inay ka qeyb galaan masuuliyiin ka tirsan dowladda federaalka, madaxda dowlad goboleedyada iyo marti sharaf ka kala timid gudaha iyo dibadda dalka.
Liibaan Axmed Xasan ayaa 22-kii Oktoobar loo doortay hoggaamiyaha Galmudug, kadib cod ay bixiyeen xildhibaannada Golaha Wakiillada ee maamulka. Isla maalintaas waxaa hoggaamiye ku xigeen loo doortay Cabdiweli Ibraahim Garyare.
Madaxweyne Xasan Sheekh ayaa markaas hambalyo u diray hoggaanka cusub, wuxuuna ugu baaqay inay mudnaanta koowaad siiyaan nabadgelyada, xallinta khilaafaadka gudaha iyo xoojinta midnimada bulshada.
Wuxuu sidoo kale ku boorriyay inay horumariyaan kaabeyaasha dhaqaalaha iyo adeegyada bulshada.
Madaxweynaha ayaa doorashadaas ku tilmaamay mid taariikhi ah, maadaama ay ka qeyb qaateen boqolaal kun oo muwaadiniin ah oo ku nool magaalooyinka iyo miyiga Galmudug.
Xafladda caleemo saarka ka hor, amniga Dhuusamareeb ayaa si weyn loo adkeeyay.
Ciidamada aan ka mid ahayn kuwa loo xilsaaray ilaalinta xarunta maamulka ayaa laga mamnuucay inay hub ku qaataan gudaha magaalada, waxaana socda baaritaanno lagu sameynayo gaadiidka.
Tallaabooyinkan ayaa qeyb ka ah qorshe amni oo loogu talagalay sugidda xasilloonida magaalada inta ay socoto xafladda.
