Wararka24: Hoteelka caanka ah ee Burj Al Arab oo ku yaalla magaalada Dubai ayaa la shaaciyay in si ku-meel-gaar ah loo xiri doono muddo dhan 18 bilood, si dib-u-habeyn ballaaran loogu sameeyo.
Shirkadda Jumeirah Group ee maamusha hoteelka ayaa sheegtay in mashruucan uu yahay mid muddo dheer la qorsheynayay, islamarkaana lagu fulin doono wajiyo kala duwan, iyadoo naqshadeynta gudaha uu hoggaamin doono naqshadeeye caalami ah.
Ilo ku dhow hoteelka ayaa xaqiijiyay in Burj Al Arab gebi ahaanba la xiri doono inta lagu guda jiro dib-u-habeynta, isla markaana macaamiisha hore u sii qabsatay loo wareejin doono hoteello kale oo u dhow.
Burj Al Arab, oo ka mid ah astaamaha ugu caansan ee dalxiiska Dubai, ayaa lagu tirinayaa meelaha ugu soo jiidashada badan ee ay booqdaan dalxiisayaasha caalamka, isaga oo saf la gala dhismayaal kale oo caan ah sida Burj Khalifa.
Wararka ayaa sidoo kale sheegaya in go’aanka dib-u-habeynta uu ku soo beegmay xilli uu hoos u dhac ku yimid dalxiiska gobolka, inkastoo shirkadda Jumeirah aysan si toos ah u xiriirin mashruuca iyo xaaladaha amni ee gobolka.
Si kastaba, xiritaanka hoteelkan ayaa saameyn ku yeelan kara waaxda dalxiiska ee Dubai, maadaama Burj Al Arab uu yahay mid ka mid ah meelaha ugu muhiimsan ee soo jiita dadka booqda dalka..
