Wararka24: Ciidamada Badda Shiinaha ayaa dhoolatus militari ka sameeyay biyaha Soomaaliya, iyadoo tababarka lagu tijaabiyay awoodda ciidamada ee ka jawaabista afduubka maraakiibta iyo samatabbixinta shaqaalaha saaran.
Dhoolatuska waxaa fuliyay Guutada 49-aad ee Ciidamada Badda Shiinaha, waxaana ciidamada lagu tababaray sidii looga hortagi lahaa marka markab la qafaasho. Ujeeddadu waxay ahayd in la qiimeeyo diyaar-garowga iyo awoodda ciidamada ee wax looga qaban karo xaaladaha degdegga ah ee badda.
Intii uu socday tababarka, ciidamada ayaa sameeyay howlgallo ay ku baarayaan markab laga shakisan yahay, Ciidamada ayaa sidoo kale soo bandhigay farsamooyin loogu talagalay in si degdeg ah looga jawaabo weerarro iyo afduubyo ka dhaca maraakiibta ganacsiga.
Dhoolatuskan ayaa kusoo beegmaya xilli walaac cusub laga muujinayo amniga maraakiibta isaga kala goosha xeebaha Soomaaliya iyo Gacanka Cadmeed. Bilihii u dambeeyay ayaa la soo sheegay dhacdooyin la xiriira burcad-badeednimo iyo weerarro lagu qaaday maraakiib ku sugan biyaha gobolka.
17-kii August, markabka MV LUTUF ayaa lagu qafaashay meel ka baxsan xeebaha Puntland, sida ay sheegeen wararka laga helay gobolka. Saddex maalmood kadib, 20-kii August, markab shidaal oo lagu magacaabo Sibu 1 ayaa lagu afduubtay meel ka baxsan xeebaha Yemen, waxaana markii dambe loo weeciyay dhanka xeebaha Soomaaliya.
Dhacdooyinkan ayaa dib u soo celiyay walaaca laga qabo in burcad-badeednimadu mar kale noqoto khatar ku wajahan maraakiibta ganacsiga ee isticmaala marin-biyoodka Gacanka Cadmeed iyo xeebaha Soomaaliya. Amniga waddooyinkan ayaa muhiim u ah isu-socodka ganacsiga caalamiga ah ee u dhexeeya Aasiya, Bariga Dhexe, Afrika iyo Yurub.
Shiinaha ayaa muddo dheer qeyb ka ahaa howlaha caalamiga ah ee lagu sugayo amniga maraakiibta ee biyaha Soomaaliya iyo Gacanka Cadmeed. Ciidamada Badda Shiinaha ayaa tan iyo 2008 si joogto ah uga qeyb qaadanayay howlgalada la xiriira la-dagaallanka burcad-badeednimada iyo ilaalinta maraakiibta ganacsiga.
Beijing ayaa sidoo kale muddooyinkii dambe kordhisay muhiimadda ay siinayso amniga marin-biyoodka gobolka, maadaama maraakiib badan oo ganacsi iyo kuwo shidaal ay maraan waddooyinka badda ee ku dhow Soomaaliya iyo Yemen. Dhoolatuska cusub ayaa muujinaya in ciidamada Shiinaha ay weli diiradda saarayaan diyaar-garowga ka dhanka ah khataraha badda.
Si kastaba, tababarka ayaa sidoo kale kusoo aadaya xilli ciidamada iyo hay’adaha ammaanka ee gobolka ay wajahaan baaqyo ku saabsan in la xoojiyo wada-shaqeynta lagu ilaalinayo maraakiibta iyo shaqaalaha badda. Haddii weerarrada iyo afduubyadu sii kordhaan, waxay saameyn ku yeelan karaan kharashaadka gaadiidka iyo amniga ganacsiga maraakiibta ee gobolka.
