Wararka24: Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa maanta oo ah 1-da Sebtember 2026 magaalada Belgrade ee dalka Serbia kaga qeyb galay shir heerka sare ah ee Dhaqdhaqaaqa Dalalka Aan Isbahaysiga Ahayn (NAM), oo lagu xusayo 65-guurada shirkii ugu horreeyay ee dhaqdhaqaaqa oo magaaladaas lagu qabtay 1961-kii.
Madaxweynaha ayaa khudbaddiisa ku soo bandhigay caqabadaha amniga, kuwa siyaasadeed iyo caqabadaha dhaqaale ee dunidu wajahayso. isagoo sheegay in xaaladaha sii kordhaya ay u baahan yihiin iskaashi iyo dadaal wadajir ah oo heer caalami ah. Wuxuu si gaar ah u xusay colaadaha, argagixisada, xiisadaha juqraafi-siyaasadeed iyo isbeddelka cimilada.
Xasan Sheekh ayaa sheegay in caqabadahaas aan si gooni-gooni ah loogu xallin karin, balse ay muhiim tahay in dowladuhu xoojiyaan wada-shaqeynta iyo isku-duwidda dadaallada. Hadalkiisa ayaa diiradda saaray baahida loo qabo in la helo xalal ku dhisan iskaashi caalami ah.
Madaxweynaha ayaa sidoo kale ka hadlay xaaladda Soomaaliya iyo dadaallada Dowladda Federaalka ee ku aaddan xasilloonida, dib-u-dhiska hay’adaha dowladda iyo horumarinta dalka. Wuxuu sheegay in taageerada bahwadaagta caalamiga ah ay muhiim u tahay dadaallada Soomaaliya ee dhinacyada amniga, dowlad-dhiska iyo horumarinta.
Xasan Sheekh ayaa uga mahadceliyay dalalka iyo hay’adaha caalamiga ah ee taageera Soomaaliya, isagoo tilmaamay in iskaashiga caalamiga ah uu door muhiim ah ka qaadanayo dadaallada lagu xoojinayo xasilloonida iyo horumarka dalka.
Madaxweynaha ayaa sidoo kale adkeeyay in Soomaaliya ay ka go’an tahay mabaadi’da Dhaqdhaqaaqa Dalalka Aan Isbahaysiga Ahayn, gaar ahaan dhowrista madaxbannaanida iyo midnimada dhuleed ee dowladaha, caddaaladda iyo sinnaanta. Wuxuu sidoo kale carrabka ku adkeeyay muhiimadda ay leedahay in khilaafaadka lagu xalliyo hab nabadeed.
Shirka Belgrade ayaa isu keenaya madax iyo wakiillo ka socda dalalka ku jira Dhaqdhaqaaqa Dalalka Aan Isbahaysiga Ahayn, iyadoo kulanka sanadkan lagu xusayo 65 sano guuradii shirkii aasaaska dhaqdhaqaaqa ee 1961-kii. Soomaaliya ayaa shirka uga qeybgalaysa heer madaxweyne, waxaana Xasan Sheekh uu hoggaaminayaa wafdiga Soomaaliya.
Inta uu ku sugan yahay Serbia, Xasan Sheekh ayaa sidoo kale la filayaa inuu kulan la yeesho Madaxweynaha Serbia, Aleksandar Vučić, iyadoo labada dhinac ay ka wada hadli doonaan xiriirka iyo iskaashiga labada dal.
