Wararka24: Dowladda Soomaaliya ayaa sheegtay in hawsha qodista ceelka shidaalka ee Curad-1, oo Turkiga ka waddo xeebaha Soomaaliya, ay si wanaagsan u socoto, iyadoo la filayo in shaqada la soo gabagabeeyo dhammaadka bisha Sebtembar.
Mashruuca ayaa markii hore loo qorsheeyay in la dhameystiro bisha Oktoobar, balse xawaaraha qodista ayaa ka sarreeya jadwalkii hore.
Agaasimaha Guud ee Hay’adda Batroolka Soomaaliya, Cabdulqaadir Aadan, ayaa sheegay in qodista ceelku ay gaartay ku dhawaad 3,000 mitir. Wuxuu sheegay in hawshu aysan la kulmin caqabado farsamo oo waaweyn, taasoo suuragelin karta in mashruuca la dhameystiro bil ka hor waqtigii hore loo qorsheeyay.
“Waxaa suuragal ah in hawsha la soo gabagabeeyo dhammaadka Sebtembar. Oktoobar ayaa markii hore loo qorsheeyay inay noqoto waqtiga dhammaystirka,” ayuu yiri Cabdulqaadir Aadan.
Agaasimaha ayaa sidoo kale sheegay in ilaa hadda aan la soo sheegin shilal ama cilado farsamo oo hakad geliyay hawsha. Sida uu sheegay, shaqada waxaa lagu wadaa iyadoo la raacayo heerarka badbaadada iyo shuruudaha farsamo ee loogu talagalay howlaha qodista badda.
Qiyaastii 470 ilaa 480 qof ayaa ka shaqeynaya maraakiibta qodista iyo kuwa taageerada ee mashruuca. Muwaadiniinta turkida ayaa ah ku dhawaad 20 boqolkiiba shaqaalaha ku lugta leh hawsha.
Markabka qodista ee jiilka toddobaad ee Türkiye, Çağrı Bey, ayaa hadda wada qodista Curad-1, oo ku yaalla qiyaastii 370 kiiloomitir dhinaca badda uga beegan Muqdisho. Hawsha ayaa qayb ka ah iskaashiga ballaaran ee Soomaaliya iyo Türkiye ee dhinaca tamarta iyo sahminta khayraadka dabiiciga ah.
Qorshaha qodista ayaa ah in ceelku gaaro ku dhawaad 4,000 mitir oo ka hooseeya sagxadda badda. Marka lagu daro qoto-dheeraanta biyaha, wadarta qoto-dheeraanta ceelka ayaa la filayaa inay gaarto ku dhawaad 7,500 mitir.
Curad-1 ayaa noqonaya ceel muhiim u ah qorshaha Soomaaliya ee lagu sahaminayo khayraadka shidaalka ee ku jira badda. Dowladda Soomaaliya ayaa rajaynaysa in sahminta noocan ah ay gacan ka geysan karto in la helo xog dheeraad ah oo ku saabsan kaydka shidaalka iyo gaaska dabiiciga ah ee dalka.
Mashruucan ayaa sidoo kale ah hawlgalkii ugu horreeyay ee Türkiye ay ku fuliso qodista shidaalka badda hoosteeda iyadoo ka baxsan biyaha dhuleedkeeda. Natiijada ceelka ayaa la filayaa inay bixiso xog muhiim ah oo ku saabsan fursadaha shidaal ee ku jira aagga lagu sameynayo sahminta.
