Wararka24: Madaxweynaha Koonfur Galbeed, Aadan Madoobe, ayaa soo gabagabeeyay kulamo uu la yeeshay saraakiisha ciidamada Dowladda Federaalka iyo kuwa Daraawiishta Koonfur Galbeed, isagoo faray in la qaado tallaabooyin amni oo lagu sugayo magaalada Baydhabo iyo deegaanada ku xeeran.
Kulamada uu madaxweynuhu la yeeshay saraakiisha amniga ayaa diiradda lagu saaray xaaladda amni ee Baydhabo iyo sidii looga hortagi lahaa weerarro ka iman kara Al-Shabaab iyo ciidamada daacadda u ah hoggaamiyihii hore ee Koonfur Galbeed, Cabdicasiis Lafta-gareen.
Aadan Madoobe ayaa ciidamada ku amray inay ka howlgalaan goobaha looga shakisan yahay in laga soo abaabulo weerarrada lagu beegsanayo Baydhabo, iyadoo qorshuhu yahay in la xoojiyo difaaca magaalada iyo waddooyinka muhiimka ah.
Sida Wararka24 loo sheegay, ciidamada federaalka iyo kuwa Koonfur Galbeed ayaa loo diyaariyay inay fariisimo cusub ka sameystaan duleedka Baydhabo, iyadoo ciidamo dheeraad ah oo ka yimid Dowladda Federaalka ay shalay magaalada gaareen.
Aadan Madoobe ayaa horey Dowladda Federaalka uga dalbaday taageero ciidan oo dheeraad ah, si loo xoojiyo amniga Baydhabo. Ilo xog-ogaal ah ayaa sheegay in dowladda ay fulisay qaar ka mid ah ballamihii ay horey ula gashay maamulka Koonfur Galbeed.
Qorshahan ayaa kusoo aadaya xilli Baydhabo ay ka jirto xaalad siyaasadeed iyo mid amni oo xasaasi ah, iyadoo dhinacyo kala duwan ay isku hayaan maamulka iyo mustaqbalka siyaasadeed ee Koonfur Galbeed.
Si kastaba, weli si rasmi ah looma shaacin waqtiga ay ciidamada bilaabayaan howl-gallada, waxaana isha lagu hayaa tallaabooyinka xiga ee maamulka Koonfur Galbeed iyo Dowladda Federaalka.
