Wararka24: Dowladda Federaalka Soomaaliya ayaa xaqiijisay in mowqifkeeda rasmiga ah ee ku aaddan qadiyadda Qubrus uusan wax isbeddel ah ku imaan, iyadoo mar kale caddeysay inay ixtiraamayso madaxbannaanida, midnimada iyo wadajirka dhuleed ee Jamhuuriyadda Qubrus.
Wasaaradda Arrimaha Dibadda Soomaaliya ayaa sheegtay in siyaasadda dowladda ay ku saleysan tahay Axdiga Qaramada Midoobay iyo qaraarrada Golaha Ammaanka ee Qaramada Midoobay. Waxaa si gaar ah loo xusay Qaraarrada 541 ee 1983 iyo 550 ee 1984.
Wasaaraddu waxay sidoo kale caddeysay in qoraal shakhsi ah oo dhawaan lagu baahiyay baraha bulshada uusan matalin siyaasadda rasmiga ah ee dowladda Soomaaliya. Sidaas darteed, qoraalkaasi looma fasiran karo inuu yahay isbeddel ku yimid mowqifka Muqdisho ee arrinta Qubrus.
Dowladda ayaa si gaar ah u sheegtay in qoraalkaasi uusan ahayn aqoonsi rasmi ah oo Soomaaliya siisay cid ama maamul gaar ah oo ka jira waqooyiga jasiiradda Qubrus. Waxay intaas ku dartay in aan la gaarin wax go’aan rasmi ah oo lagu beddelayo siyaasaddii muddada dheer ay Soomaaliya ka lahayd arrintan.
Mowqifka Soomaaliya ayaa ku saleysan taageerada ay u hayso madaxbannaanida iyo midnimada Jamhuuriyadda Qubrus, iyadoo dowladda ay sheegtay inay ku adkeysan doonto mabaadi’da sharciga caalamiga ah iyo qaraarrada Golaha Ammaanka.
Wasaaradda Arrimaha Dibadda ayaa sidoo kale sheegtay in Soomaaliya ay taageersan tahay in khilaafka Qubrus lagu xalliyo si nabadeed. Waxay tilmaantay in wada-hadal iyo heshiis ay labada dhinac gaaraan, iyadoo taageero laga helayo Qaramada Midoobay, uu yahay waddada lagu gaari karo xal waara.
Dowladdu waxay ku adkaysatay in dadaallada lagu xallinayo khilaafka ay waajib tahay inay ixtiraamaan sharciga caalamiga ah iyo qaraarrada Golaha Ammaanka ee khuseeya arrinta Qubrus.
Caddeyntan ayaa timid kaddib qoraal baraha bulshada lagu faafiyay oo sababay su’aalo ku saabsan mowqifka rasmiga ah ee Soomaaliya, iyadoo Wasaaradda Arrimaha Dibadda ay doonaysay inay kala caddeyso siyaasadda dowladda iyo aragtiyada shaqsiyaadka.
