Wararka24: Ugu yaraan 20 qof ayaa ku dhintay dhulgariir cabbirkiisu yahay 7.7 aya maanta oo Sabtidii ka dhacay bariga Indonesia, sida ay sheegeen hay’adaha samatabbixinta. Dhulgariirka oo ka dhacay meel ka baxsan xeebaha jasiiradda Flores ayaa sababay burbur dhismayaal, dhul-go’ iyo in kumannaan qof ay ka cararaan guryahooda.
Magaalada dekedda ah ee Maumere, oo ka tirsan gobolka Sikka, kooxaha samatabbixinta ayaa helay 20 qof oo dhintay, lix dhaawac ah iyo laba qof oo weli ku xayiran burburka hoostiisa. Maumere ayaa ka mid ah meelaha sida weyn uu u saameeyay dhulgariirku, iyadoo kooxaha gurmadku ay sii wadaan baaritaanka dhismayaasha burburay.
Dhulgariirka ayaa sidoo kale saameeyay gobolka Nagekeo oo ku dhow halka uu dhulgariirku ka dhacay. Isgaarsiinta halkaas ayaa hakad gashay, iyadoo dhul-go’ ay xannibeen waddooyin muhiim ah oo ay ku adkaatay in kooxaha samatabbixintu ay gaaraan meelaha ay dhibaatadu ka dhacday sida warbahinta CNBC warisay.
Hay’adda qaranka ee maaraynta musiibooyinka Indonesia ayaa sheegtay in ku dhowaad 2,000 oo qof ay ka qaxeen Nagekeo. Burburka ayaa laga soo sheegay dhismayaal, bakhaarro iyo xarumo dowladeed, halka koronto la’aan iyo ciriiri gaadiidna laga diiwaangeliyay qaybo ka mid ah gobolka.
Dhulgariirka ayaa sababay mowjado tsunami ah oo ka hooseeyay hal mitir qeybo ka mid ah Indonesia. Digniinta tsunami-ga ayaa la qaaday qiyaastii saddex saacadood kadib, iyadoo mas’uuliyiintu ay sii wadeen la socodka gariirrada dambe ee dhacay.
Hay’adda juqraafiga Indonesia ee BMKG ayaa sheegtay in dhulgariirku dhacay saacadihii hore ee maanta oo Sabti ah, iyadoo baaxadisa lagu qiyaasay 15 kiiloomitir. Gariir xooggan ayaa laga dareemay qaybo ka mid ah Bariga iyo Galbeedka Nusa Tenggara iyo Koonfurta Sulawesi.
Isbitaallo ku yaalla meelaha ay dhibaatadu gaartay ayaa bukaanno u raray bannaanka sababo la xiriira cabsi laga qabo burbur kale iyo gariirrada dambe. Waddooyin qaar ayaa xirmay kadib dhul-go’, taas oo sii adkeysay dadaallada gurmadka iyo is gaarsiinta adeegyada degdegga ah.
Dhulgariirkii 1992 oo ka dhacay isla gobolkan
Indonesia waxay ku taallaa aagga loo yaqaan “Ring of Fire” ee Badweynta Baasifigga, halkaas oo dhaqdhaqaaqa taarikada dhulka uu sababo dhulgariirro iyo foolkaanooyin badan. Dhulgariirkii 1992 ee Flores oo cabbirkiisu ahaa 7.5 ayaa sidoo kale sababay burbur iyo khasaaro xooggan oo ka dhacay isla gobolkan
