Wararka24: Alle ha u naxariistee, hobolkii caanka ahaa ee Soomaaliyeed Axmed Cali Cigaal ayaa maanta ku geeriyooday dalka Maraykanka, halkaas oo uu muddooyinkii u dambeeyay ku noolaa. Geeridiisa ayaa murugo ku abuurtay bahda fanka Soomaaliyeed, qoyskiisa, asxaabtiisa iyo guud ahaan shacabka Soomaaliyeed ee muddada dheer ku riyaaqayay hal-abuurkiisa iyo fankiisa.
Axmed Cali Cigaal waxa uu ka mid ahaa haldooradii ugu magaca dheeraa ee fanka Soomaaliyeed, isagoo caan ku ahaa heesaha, laxan-samaynta iyo tumista muusigga. Intii uu ku jiray mihnadda fanka waxa uu door muuqda ka qaatay kobcinta suugaanta Soomaaliyeed, isaga oo laxan u sameeyay boqolaal heesood oo ay qaadeen fannaaniin caan ah, halka kuwo kalena uu isagu ku luuqeeyay.
Marxuumka ayaa dabayaaqadii sannadihii 1940-meeyadii ku dhashay magaalada Wardheer ee gobolka Doollo. Horraantii 1960-meeyadii ayuu u wareegay magaalada Muqdisho, halkaas oo uu waxbarashadiisa ka bilaabay, isla markaana uu saldhig uga dhigtay socdaalkiisii fanka.
Safarkiisa fanka ayaa si rasmi ah u billowday sannadkii 1964, markii Raadiyow Muqdisho laga baahiyay heestii ugu horreysay ee uu qaaday, taas oo cinwaankeedu ahaa “Bari iyo Galbeed, Keebaa Na Baantay?”. Heestaasi waxay si weyn u soo jiidatay shacabka, iyadoo albaab u furtay inuu noqdo mid ka mid ah hobolladii ugu caansanaa Soomaalida.
Kadib wuxuu ku biiray Dugsigii Muusigga, halkaas oo uu si cilmiyaysan ugu bartay muusigga iyo laxan-samaynta. Wuxuu door weyn ku lahaa ruwaayado caan noqday sida “Talo iyo Tallaabo,” “Yaxaas Dhagaduub” iyo “Shabeelnaagood,” isagoo u sameeyay laxanka heeso badan oo qayb ka ahaa ruwaayadahaas.
Muddo ka badan nus qarni ayuu Axmed Cali Cigaal ka tirsanaa Hobollada Qaranka ee Waaberi. Inta uu halkaas ka tirsanaa wuxuu laxan iyo muusig u sameeyay heeso badan oo caan noqday, kuwaas oo ay ka mid yihiin Batalaale, Candaliibka, Raad Abeeso, Dadnimada Aqoonso, Galaydh, Feejignow, Haasaawe, Gayaan, Gacallo iyo Caraweelo, kuwaas oo weli ka mid ah kaydka dahabiga ah ee fanka Soomaaliyeed.
Geerida Alle ha u naxariistee Axmed Cali Cigaal waxay ka dhigan tahay luminta haldoor muhiim ah oo door weyn ku lahaa horumarka fanka Soomaaliyeed. Dhaxalka suugaaneed iyo faneed ee uu ka tegay ayaa sii ahaan doona mid ay jiilasha dambe ka dhaxlaan, waxaana lagu xasuusan doonaa kaalintii uu ku lahaa kobcinta fanka, laxamadiisii iyo codkiisii lagu yaqaanay. Innaa Lillaahi Wa Innaa Ilayhi Raajicuun.
