Wararka24: Baarlamaanka Turkiga ayaa ansixiyay qaraar lagu kordhinayo muddada ay ciidamada qalabka sida ee Turkigu ka howlgalayaan Soomaaliya laba sano oo kale, laga bilaabo 27-ka Luulyo 2026, si ay u sii wadaan taageerada dhinacyada amniga, tababarka ciidamada iyo la dagaallanka argagixisada.
Qaraarkan ayaa ku saleysan codsi uu Baarlamaanka u gudbiyay Madaxweynaha Turkiga, Recep Tayyip Erdoğan, kaas oo lagu sheegay in amniga iyo xasilloonida Soomaaliya ay muhiim u yihiin nabadda iyo amniga guud ee gobolka, isla markaana ay lagama maarmaan tahay in la sii wado iskaashiga difaaca ee labada dal.
Sida ku cad qoraalka, Turkiga ayaa tan iyo sannadkii 2011 Soomaaliya kala shaqeynayay dhinacyada siyaasadda, dhaqaalaha, bulshada iyo amniga. Dowladda Turkiga ayaa sidoo kale sheegtay in xiriirka labada dal uu ku dhisan yahay iskaashi dhow iyo kalsoonida shacabka Soomaaliyeed.
Qaraarka ayaa xusay in ciidamada Turkigu ay sii wadi doonaan tababarka, la-tashiga iyo taageerada farsamo ee lagu xoojinayo awoodda ciidamada amniga Soomaaliya, iyadoo la raacayo heshiisyada iskaashiga militari iyo difaaca ee u dhexeeya labada dal.
Sidoo kale, waxaa lagu sheegay in Dowladda Federaalka Soomaaliya ay Turkiga ka codsatay inuu sii wado taageerada uu ka geysto la dagaallanka argagixisada, burcad-badeedda, kalluumeysiga sharci darrada ah iyo khataraha kale ee amniga, kuwaas oo saameyn ku leh xasilloonida Soomaaliya iyo gobolka.
Turkiga ayaa tan iyo sannadkii 2009 ka qeyb ahaa howlgalka caalamiga ah ee ciidamada badda ee la dagaallama burcad-badeedda xeebaha Soomaaliya iyo biyaha ku dhow. Dowladda Turkiga ayaa sheegtay in kordhinta howlgalka ay qeyb ka tahay dadaallada lagu xoojinayo amniga Soomaaliya, ilaalinta marin-biyoodka muhiimka ah iyo taageerada hay’adaha amniga ee dalka.
