Wararka24: Taliyihii saldhigga Booliiska degmada Jariiban ee gobolka Mudug, Guleed Kadleeye, ayaa geeriyooday kaddib markii xalay lagu weeraray degmadaas. Sida ay sheegeen mas’uuliyiinta amniga, nin hubeysan ayaa rasaas ku furay taliyaha, waxaana asagoo dhaawac ah loo qaaday isbitaalka Jariiban, balse wuxuu u geeriyooday dhaawacyadii soo gaaray.
Ilaa iyo hadda, mas’uuliyiintu si rasmi ah uma shaacin sababta ka dambeysay weerarka lagu dilay taliyaha. Ciidamada ammaanka ayaa bilaabay baaritaanno lagu ogaanayo duruufaha dilka iyo cid kasta oo ku lug leh.
Marxuum Guleed Kadleeye wuxuu ka mid ahaa ciidamadii booliiska ee lagu soo tababaray dalka Turkiga xilligii dowladdii Madaxweyne Maxamed Cabdullaahi Farmaajo.
Wuxuu dhowaan ka mid noqday saraakiishii loo kala diray degmooyinka Puntland si loo xoojiyo ammaanka, isagoo ka shaqeynayay sugidda amniga Jariiban iyo la dagaallanka hubka sharci-darrada ah.
Degmada Jariiban ayaa muhiim u ah dhinaca amniga, iyadoo saldhig u ah ciidamo dhowaan ay qortay Dowladda Federaalka Soomaaliya. Sidoo kale, mararka qaar waxaa laga soo sheegaa dhaqdhaqaaqyo la xiriira burcad-badeednimo oo ka dhaca deegaannada u dhow xeebaha gobolka Mudug.
Dhanka kale, Taliska Qaybta Booliiska Gobolka Mudug ayaa sheegay in ciidamada ammaanku ay gacanta ku dhigeen nin lagu magacaabo Ibraahim Kooshin, kaas oo lagu eedeeyay inuu ka dambeeyay dilka taliyaha.
Sida talisku sheegay, eedeysanaha ayaa lagu qabtay howlgal degdeg ah oo la fuliyay saacado yar kaddib dhacdada, waxaana la filayaa in loo gudbiyo hay’adaha garsoorka si loo mariya habraaca sharciga.
