Wasiirka Arrimaha Dibadda iyo Iskaashiga Caalamiga ah ee Soomaaliya, Cabdisalaan Cabdi Cali (Dhaay), ayaa sheegay in wada-hadallada u socda Dowladda Federaalka iyo dhinacyada mucaaradka ay marayaan heer wanaagsan, isagoo rajo ka muujiyay in laga gaaro is-afgarad ku saabsan arrimaha siyaasadda iyo doorashooyinka.
Wasiirka oo ka hadlay shir ka furmay magaalada Muqdisho ayaa qiray in dalka uu ku jiro marxalad siyaasadeed oo xasaasi ah, isla markaana uu jiro is-jiidjiid u dhexeeya dhinacyada siyaasadda. Wuxuu xusay in kala aragti duwanaanshahaasi uu yahay qayb ka mid ah geeddi-socodka dimuqraadiyadda, isla markaana laga gudbi karo iyadoo loo marayo wada-hadal.
Cabdisalaan Dhaay ayaa sheegay in kulamada u socda dowladda iyo mucaaradka, oo ay garwadeen ka yihiin saaxiibbada caalamka, ay si wanaagsan u socdaan. Wuxuu tilmaamay in dowladda ay rajeynayso in wada-hadalladaasi ay horseedaan natiijo lagu wada qanco, isla markaana lagu xalliyo qodobada la isku hayo.
Dowladda Federaalka iyo dhinacyada mucaaradka ayaa guud ahaan isku raacsan mabda’a ah in Soomaaliya loo jiheeyo doorasho qof iyo cod ah. Si kastaba, waxaa weli taagan kala aragti duwanaansho la xiriira qaabka, waqtiga iyo habraaca lagu hirgelinayo nidaamka doorashooyinka tooska ah.
Guddoomiyihii hore ee Guddiga Madaxa-bannaan ee Doorashooyinka Qaranka, Xaliimo Ismaaciil Ibraahim (Xaliimo Yarey), ayaa sheegtay in caqabadda ugu weyn aysan ahayn go’aanka qabashada doorashada, balse ay tahay sidii loo hirgelin lahaa hannaan lagu wada heshiiyo. Waxay xustay in loo baahan yahay in si cad looga heshiiyo qaabka loo marayo geeddi-socodka doorashada.
Soomaaliya ayaa wajahaysa marxalad muhiim u ah mustaqbalka siyaasadeed ee dalka, iyadoo dowladda, mucaaradka iyo saamileyda kale ay sii wadaan dadaallada lagu doonayo in heshiis looga gaaro hannaanka doorashooyinka iyo dhameystirka geeddi-socodka dimuqraadiyeynta.
