Wararka24: Wada-hadallada siyaasadeed ee u dhexeeya Dowladda Federaalka Soomaaliya iyo dhinacyada mucaaradka ayaa maanta galay wajiga labaad, iyadoo diiradda lagu saarayo xal u helidda khilaafka ka taagan hannaanka doorashooyinka iyo wax ka beddelka Dastuurka Ku-meel-gaarka ah.
Kulanka ugu horreeyay ee maanta ayaa dhex maray ergo ka socota Dowladda Federaalka iyo guddiga farsamada ee matalaya Madaxweynihii hore ee Soomaaliya, Maxamed Cabdullaahi Farmaajo. Kulanka waxaa goob-joog ka ahaa wakiillo ka socda Dowladda Turkiga iyo xubno ka socday beesha caalamka oo ka qeyb qaadanaya fududeynta wada-hadallada.
Kooxda Nabad iyo Nolol ayaa warsaxaafadeed ay soo saartay ku sheegtay in guddigeeda farsamada uu si rasmi ah u galay wajiga labaad ee wada-xaajoodyada. Waxay xustay in aragtidooda ay ku saleysan tahay midnimo iyo wadajir, si xal looga gaaro xaaladda siyaasadeed ee dalka.
Sidoo kale, kooxda ayaa sheegtay inay kulanka kusoo bandhigi doonto hindise ku saabsan nooca doorasho ee xilligan dalka ka qabsoomi karta, iyo shuruudaha lagama maarmaanka u ah hirgelinta nidaam lagu wada heshiiyo.
Waxaa sidoo kale la qorsheeyay kulan kale oo dhex mari doona wakiillada Dowladda Federaalka iyo xubnaha Golaha Mustaqbalka Soomaaliyeed, kaas oo isna diiradda lagu saari doono qodobbada la xiriira hannaanka doorashooyinka iyo sidii loo yareyn lahaa is-mari-waaga siyaasadeed.
Wada-hadalladan oo billowday 7-dii Luulyo ayaa loo arkaa dadaal muhiim ah oo lagu raadinayo is-afgarad siyaasadeed oo loo dhan yahay. Dowladda Federaalka iyo mucaaradkuba waxay hore u muujiyeen inay ka go’an tahay sii wadista wada-xaajoodyada, iyadoo Dowladda Turkiga ay door ka qaadaneyso fududeynta geeddi-socodka.
Kulamadan ayaa kusoo aadaya xilli Soomaaliya ay wajahaysa dood siyaasadeed oo xooggan oo ku saabsan nidaamka doorashooyinka iyo mustaqbalka geeddi-socodka dimuqraadiyadda.
Indhaha siyaasiyiinta iyo bulshada Soomaaliyeed ayaa haatan ku wajahan natiijooyinka kasoo baxa wada-hadalladan iyo suurtagalnimada in laga gaaro heshiis wax ku ool ah oo horseeda xasillooni siyaasadeed.
