Ciidanka Xoogga Dalka Soomaaliyeed ayaa howlgallo amni iyo sifeyn ah ka fuliyay deegaanno ka tirsan gobolka Shabeellaha Hoose, kuwaas oo lagu burburiyay fariisimo ay isticmaali jireen dagaalyahannada Al-Shabaab, sida ay baahisay Warbaahinta Ciidamada Qalabka Sida.
Sida lagu sheegay war kasoo baxay ciidamada, Ururka 161-aad ee Guutada 16-aad Kumaandooska Danab ayaa howlgal qorsheysan ka fuliyay deegaannada Leego, Warta Madax Maroodi, Iidow Jalaat iyo Saaxweyn. Howlgalka ayaa diiradda lagu saaray sugidda amniga, baaritaanka goobaha muhiimka ah iyo waddooyinka isku xira deegaannadaas, si looga hortago dhaq-dhaqaaqyada Al-Shabaab.
Dhanka kale, Ururka 251-aad ee Guutada 25-aad ayaa howlgallo sifeyn iyo burburin ah ka sameeyay deegaannada Shabeeley, Bangaley, Fay Yuusuf iyo Cismaan Dure oo hoostaga deegaanka Toora-tooroow. Ciidamada ayaa sheegay inay halkaas ku burburiyeen fariisimo ay kooxda u adeegsan jirtay abaabulka iyo dhaqdhaqaaqyada.
Taliyaha Ururka 251-aad, Maxamed Xasan Abuukar (Dhaga-dheere), ayaa sheegay in howlgalka lagu guuleystay burburinta saldhigyo ay Al-Shabaab ku lahayd deegaannadaasi, isagoo xusay in tallaabadaasi ay qeyb ka tahay dadaallada lagu xaqiijinayo amniga iyo ka hortagga weerarro lagu beegsan lahaa shacabka rayidka ah.
Ciidanka Xoogga Dalka Soomaaliyeed ayaa sheegay inay sii wadi doonaan howlgallada ka dhanka ah Al-Shabaab ee ka socda gobollo kala duwan, si loo xoojiyo amniga loogana saaro kooxda goobaha ay weli ku sugan tahay. Waxay sidoo kale shacabka ugu baaqeen inay la shaqeeyaan hay’adaha amniga, isla markaana ay soo gudbiyaan xog kasta oo la xiriirta dhaq-dhaqaaqyo laga shakiyo.
Howlgalladan ayaa kusoo aadaya xilli Dowladda Federaalka Soomaaliya ay kordhisay dadaallada militari ee ka dhanka ah Al-Shabaab, iyadoo ciidamada dowladda iyo kuwa deegaanka ay wadaan gulufyo ka socda gobollo dhowr ah oo dalka ka tirsan.
