Wararka24: Madaxweynaha Jamhuuriyadda Federaalka Soomaaliya Xasan Sheekh Maxamuud ayaa sheegay in dowladda federaalka ay bilaabi doonto guluf dagaal oo cusub oo lagu beegsanayo Al-Shabaab, isaga oo xusay in la joogo waqtigii la soo afjari lahaa khatarta ay kooxda ku hayso amniga dalka.
Madaxweynaha ayaa hadalkan ka sheegay khudbad uu jeediyay, isagoo carrabka ku adkeeyay in ciidamada qalabka sida, shacabka iyo saaxiibbada caalamiga ah ay sii xoojin doonaan howlgallada ka socda deegaannada ay weli ku sugan yihiin xubnaha Al-Shabaab.
Xasan Sheekh Maxamuud ayaa sheegay in dowladda ay ka go’an tahay in dalka laga xoreeyo kooxda, isla markaana la xaqiijiyo amni iyo xasillooni waarta oo ay ka faa’iideystaan shacabka Soomaaliyeed. Wuxuu tilmaamay in qorshaha cusub uu ka koobnaan doono tallaabooyin ciidan iyo kuwo lagu xoojinayo wada-shaqeynta dowladda iyo bulshada.
“Dowladda Soomaaliya waxay qaadi doontaa guluf dagaal oo kama dambeys ah, kaas oo dalka looga saarayo Khawaarijta, dadka Soomaaliyeedna dhawaan ayaan la wadaagi doonnaa qorshahaas,” ayuu yiri Madaxweynaha Soomaaliya.
Madaxweynaha ayaa sidoo kale sheegay in dowladda ay doonayso in la xaqiijiyo amni waara, dib loo furo waddooyinka xiran iyo in bulshada loo abuuro fursado nololeed oo wanaagsan, si loo taageero dadaallada xasilinta iyo horumarka dalka.
Wuxuu ugu baaqay shacabka Soomaaliyeed inay sii xoojiyaan taageerada ay siiyaan ciidamada qaranka, isla markaana ay qeyb ka noqdaan dadaallada lagu sugayo nabadda, xasilloonida iyo dib-u-dhiska Soomaaliya.
Dowladda Federaalka Soomaaliya ayaa sanadihii u dambeeyay wadday howlgallo ciidan oo ka dhan ah Al-Shabaab, iyadoo taageero dhinaca amniga iyo sirdoonka ah ka heleysa dalal iyo hay’ado caalami ah oo ka qeyb qaata dadaallada lagu xoojinayo amniga dalka.
