Wararka24: Madaxweynaha Jamhuuriyadda Federaalka Soomaaliya Xasan Sheekh Maxamuud ayaa maanta Xarunta Madaxtooyada ku qaabilay wafdi heer sare ah oo ka socday dowladda Talyaaniga, kaas oo uu hoggaaminayay Wasiirka Arrimaha Gudaha Talyaaniga Matteo Piantedosi.
Kulanka ayaa diiradda lagu saaray xoojinta xiriirka soo jireenka ah ee u dhexeeya Soomaaliya iyo Talyaaniga, iyadoo labada dhinac ay isla soo qaadeen muhiimadda ay leedahay sii wadista iskaashiga labada dowladood.
Mas’uuliyiinta ayaa ka wada hadlay arrimo la xiriira amniga, horumarinta hay’adaha dowladda, maareynta socdaalka iyo xuduudaha, iyo sidii loo ballaarin lahaa wada-shaqeynta ka dhaxeysa labada dal.
Labada dhinac ayaa sidoo kale falanqeeyay fursadaha lagu xoojin karo iskaashi istaraatiiji ah oo ku dhisan danaha wadaagga ah, si kor loogu qaado xiriirka siyaasadeed iyo kan horumarineed ee u dhexeeya Muqdisho iyo Rome.
Madaxweyne Xasan Sheekh Maxamuud ayaa adkeeyay muhiimadda ay Soomaaliya siinayso xiriirka ay la leedahay Talyaaniga, isaga oo ku tilmaamay mid taariikhi ah oo door weyn ka qaatay taageerada dib-u-dhiska iyo horumarinta hay’adaha dowladda.
Madaxweynaha ayaa xusay in iskaashiga labada dal uu wax badan ka taray dadaallada lagu xoojinayo xasilloonida, kobcinta awoodda hay’adaha dowladda iyo hirgelinta qorshayaasha horumarineed ee Soomaaliya.
Dhankiisa, Wasiirka Arrimaha Gudaha Talyaaniga Matteo Piantedosi ayaa muujiyay sida dowladda Talyaanigu uga go’an tahay sii wadista taageerada ay siiso Soomaaliya, gaar ahaan dhinacyada amniga, maamulka iyo horumarinta hay’adaha.
Soomaaliya iyo Talyaaniga ayaa leh xiriir diblomaasiyadeed oo soo jiray muddo dheer, waxaana sanadihii dambe sii xoogeysanayay iskaashiga labada dal ee dhinacyada amniga, horumarinta adeegyada dowladda iyo arrimaha socdaalka.
