Wararka24: Dowladda Iiraan ayaa si adag u cambaareysay hadallo ay sheegtay inay kasoo yeereen masuuliyiin Israa’iiliyiin ah oo ku saabsan Mojtaba Khamenei, iyadoo ku tilmaantay hanjabaado ka dhan ah hoggaanka dalkaasi.
Ergeyga Joogtada ah ee Iiraan u fadhiya Qaramada Midoobay, Amiir Saciid Iravaani, ayaa warqad u diray Xoghayaha Guud ee Qaramada Midoobay António Guterres iyo Golaha Ammaanka, isaga oo ka codsaday inay si degdeg ah uga falceliyaan hadallada ay Tehran u aragto kuwo khatar ku ah nabadda iyo xasilloonida gobolka.
Warqadda ayaa lagu sheegay in hadalladaasi ay yihiin xadgudub ka dhan ah mabaadi’da sharciga caalamiga ah iyo Axdiga Qaramada Midoobay, iyadoo Iiraan ay ku baaqday in beesha caalamku si cad uga hortagto hanjabaadaha ka dhanka ah madaxda dalalka.
Mas’uuliyiinta Iiraan ayaa sheegay in hadalladaasi ay qayb ka yihiin xiisadda sii kordheysa ee u dhexeysa Tehran iyo Tel Aviv, taas oo muddooyinkii dambe si weyn uga muuqatay gobolka Bariga Dhexe.
Wasiirka Arrimaha Dibadda ee Iiraan, Cabbaas Caraqji, ayaa sheegay in dalkiisu uu ka jawaabi doono tallaabo kasta oo uu u arko mid khatar ku ah ammaankiisa iyo madax-bannaanidiisa, isaga oo ku baaqay in la yareeyo hadallada sii hurin kara colaadaha gobolka.
Iiraan ayaa sidoo kale ugu baaqday Golaha Ammaanka ee Qaramada Midoobay inuu qaado tallaabooyin lagu xoojinayo xasilloonida gobolka, isla markaana laga hortago tallaabooyin horseedi kara isku dhac hor leh.
Dhanka kale, Israa’iil ayaan weli si rasmi ah uga jawaabin warqadda ay Iiraan u dirtay Qaramada Midoobay, iyadoo xiisadda labada dal ay weli tahay mid si dhow isha loogu hayo.
Xiisaddan ayaa kusoo aadeysa xilli gobolka Bariga Dhexe uu wajahayo xaalad amni oo cakiran, waxaana sii socda baaqyada caalamiga ah ee ku aaddan in la dejiyo xiisadaha lagana fogaado tallaabooyin horseedi kara dagaal cusub.
