Wararka24: Boqortooyada Sacuudi Carabiya ayaa xukun dil ah ku fulisay saddex muwaadin oo Soomaaliyeed, kuwaas oo lagu helay dambiyo la xiriira tahriibinta maandooriyaha, sida lagu sheegay war-saxaafadeed ay soo saartay Wasaaradda Arrimaha Gudaha ee dalkaasi.
Bayaanka ayaa lagu sheegay in saddexda nin lagu eedeeyay inay gudaha Sacuudiga si sharci darro ah ku geliyeen maandooriye nooca xashiishka ah, iyagoo ka soo gudbay xuduudaha dalka. Dowladda Sacuudiga ayaa sheegtay in maxkamadaha dalkaasi ay ku heleen dambiyada loo haystay, kaddibna lagu fuliyay xukunkii dilka ahaa.
Magacyada saddexda qof ee la sheegay in xukunka lagu fuliyay ayaa kala ah Axmed Aadan Cabdi Ibraahim, Axmed Maxamuud Ismaaciil Cabdiraxmaan iyo Maxamuud Cabdiraxmaan Xasan. Dowladda Sacuudiga ayaa xaqiijisay inay dhammaantood yihiin muwaadiniin Soomaaliyeed.
Fulinta xukunka ayaa ka dhacday gobolka Najraan ee koonfurta Sacuudi Carabiya, oo ku dhow xadka Yemen. Mas’uuliyiinta Sacuudiga ayaa sheegay in raggan lagu qabtay deegaanno ku dhow xadka xilli ay isku dayayeen inay dalka geliyaan walxo maandooriye ah.
Sacuudiga ayaa muddo dheer waday olole ka dhan ah tahriibinta iyo ka ganacsiga maandooriyaha, iyadoo dowladdaasi ay marar badan sheegtay in qof kasta oo lagu helo dambiyadaas la marsiin doono ciqaabo adag oo waafaqsan shuruucda dalka.
Shuruucda Sacuudiga ayaa ka mid ah kuwa ugu adag dunida marka ay timaaddo dambiyada la xiriira maandooriyaha, waxaana dadka lagu helo dambiyada qaarkood lagu xukumi karaa dil, kaddib marka ay maraan heerarka kala duwan ee nidaamka garsoorka.
Dilalkan ayaa kusoo beegmaya xilli Boqortooyada Sacuudi Carabiya ay sii waddo dadaallada ay ku xoojinayso la dagaallanka tahriibinta iyo ka ganacsiga walxaha maanka dooriya.
