Wararka24: Baaritaan uu daabacay wargeyska The Guardian ayaa soo bandhigay faahfaahin ku saabsan duqeyn ka dhacday magaalada Jamaame ee gobolka Jubbada Hoose bishii November ee sanadkii hore. Warbixinta ayaa sheegtay in ugu yaraan 12 qof oo rayid ah, oo ay ku jiraan carruur, ay ku dhinteen weerarkaasi oo lala xiriiriyay diyaaradaha aan duuliyaha lahayn ee Mareykanka.
Sida lagu sheegay baaritaanka, duqeyntu waxay dhacday subaxnimadii 15-kii November xilli dadka deegaanka ay ku jireen howl maalmeedkooda. Dad goob-joogayaal ah ayaa wargeyska u sheegay in diyaarado aan duuliye lahayn ay muddo dul heehaabayeen magaalada kahor inta aysan dhicin qaraxyo is xig-xigay oo saameeyay xaafado ay deganaayeen qoysas rayid ah.
Qoysaska ay waxyeelladu gaartay ayaa sheegay in haween, carruur iyo dad kale oo rayid ah ay ku jireen dadka ku dhintay weerarka. Warbixintu waxay xustay in guryo iyo goobo kale oo rayidku isticmaalaan ay burbureen, iyadoo qaar kamid ah dadka deegaanka ay sheegeen in khasaaraha uu ahaa mid aad u ballaaran.
Taliska Mareykanka ee Afrika (AFRICOM) ayaa hore u xaqiijiyay inuu duqeyn ka fuliyay deegaanka Jamaame maalintaasi. Taliska ayaa sheegay in howlgalka uu qayb ka ahaa dadaallada lagu beegsanayo dagaalyahannada Al-Shabaab, hase yeeshee ma uusan shaacin wax khasaare rayid ah oo ka dhashay weerarka.
Dadka deegaanka ee la hadlay wargeyska ayaa sheegay in aysan arkin dagaalyahanno Al-Shabaab ah gudaha magaalada xilliga duqeynta. Waxay ku adkeysteen in goobaha la weeraray ay ahaayeen xaafado ay ku noolaayeen qoysas rayid ah, arrintaas oo sii kordhisay su’aalaha la xiriira sida loo doortay bartilmaameedka weerarka.
Warbixinta ayaa sidoo kale iftiimisay kororka duqeymaha Mareykanka ee Soomaaliya sanadihii ugu dambeeyay. Hay’adaha la socda colaadaha ayaa diiwaangeliyay sare u kaca oo weerarro cirka ah, iyadoo khubaro qaar ay walaac ka muujiyeen saameynta ay rayidku ku yeelan karto.
Qoysaska lagu sheegay inay waayeen eheladooda ayaa dalbanaya baaritaan iyo faahfaahin dheeraad ah oo ku saabsan sababta loo beegsaday goobaha ay deganaayeen. Ilaa hadda ma jirto war rasmi ah oo ku saabsan magdhow ama jawaab kale oo loo fidiyay dadka ay warbixintu sheegtay inay waxyeelladu gaartay.
