Wararka24: Madaxweynaha Jamhuuriyadda Federaalka Soomaaliya Xasan Sheekh Maxamuud ayaa lagu wadaa inuu maalmaha soo socda safar shaqo ku tago magaalada Jowhar ee xarunta dowlad-goboleedka HirShabelle. Booqashadan ayaa qayb ka ah dadaallada dowladda federaalka ay ku xoojinayso xiriirka ay la leedahay dowlad-goboleedyada dalka.
Wararka la helayo ayaa sheegaya in wafdi hordhac ah oo ka socda madaxtooyada uu gaaray Jowhar si uu u diyaariyo qaban-qaabada safarka madaxweynaha iyo arrimaha la xiriira amniga. Ciidamada ammaanka ayaa sidoo kale kordhiyay howlgallada lagu sugayo nabadgelyada magaalada.
Madaxweynaha ayaa la filayaa inuu si rasmi ah u daah-furo mashaariic horumarineed oo laga hirgeliyay HirShabelle. Mashaariicdaas waxaa ka mid ah waddooyin cusub iyo xarumo loogu talagalay adeegyada dowladda iyo bulshada.
Inta uu ku sugan yahay Jowhar, Xasan Sheekh Maxamuud ayaa kulamo la qaadan doona madaxda HirShabelle iyo masuuliyiin kale. Kulamadaas ayaa diiradda lagu saari doonaa amniga, horumarinta adeegyada bulshada, dardargelinta mashaariicda dowladda iyo arrimo la xiriira geeddi-socodka doorashooyinka.
Masuuliyiinta labada dhinac ayaa sidoo kale la filayaa inay ka wada hadlaan sidii loo xoojin lahaa wada shaqeynta dowladda federaalka iyo dowlad-goboleedka HirShabelle, gaar ahaan dhinacyada horumarinta dhaqaalaha iyo adeegyada aasaasiga ah ee bulshada.
Safarkan ayaa imanaya xilli dowladda federaalka ay sii waddo qorshayaal la xiriira hirgelinta nidaamka doorashooyinka iyo ballaarinta adeegyada dowliga ah ee gobollada dalka. Magaalada Jowhar ayaa muddooyinkii dambe martigelisay kulamo iyo barnaamijyo muhiim ah oo la xiriira horumarinta maamulka iyo arrimaha siyaasadda.
Booqashada madaxweynaha ayaa sidoo kale kusoo aadeysa iyadoo guddiyada doorashooyinka ay hore u shaaciyeen jadwal la xiriira doorashooyinka la qorsheynayo inay ka dhacaan HirShabelle, taas oo ka dhigeysa safarkan mid si gaar ah isha loogu hayo.
