Dowladda Federaalka Soomaaliya ayaa markii ugu horreysay faahfaahin ka bixisay dadaalladii ay ku dooneysay in xal loogu helo caqabadihii soo wajahay Garsoore Cumar Cabduqaadir Cartan, kaas oo ka baaqday ka qeybgalka ka garsoorka ciyaaraha koobka adduunka kadib markii loo diiday gelitaanka dalka Mareykanka.
War-saxaafadeed ay soo saartay Wasaaradda Dhallinyarada iyo Isboortiska ayaa lagu sheegay in dowladda ay ka xun tahay duruufihii sababay in garsooraha Soomaaliyeed uu seego fursadda uu kaga qeyb geli lahaa tartanka ka socda Mareykanka, Canada iyo Mexico. Wasaaraddu waxay tilmaantay in arrintan ay saameyn ku yeelatay qorshihii ka qeybgalka Cartan ee tartankaasi.
Sida lagu sheegay bayaanka, markii la ogaaday caqabadaha la xiriira gelitaanka Mareykanka, waxaa la sameeyay dadaallo diblomaasiyadeed oo ay iska kaashadeen Wasaaradda Arrimaha Dibadda, Madaxtooyada Qaranka iyo Wasaaradda Dhallinyarada iyo Isboortiska. Dadaalladaas ayaa lagu doonayay in xal degdeg ah loogu helo xaaladda garsooraha.
Wasaaraddu waxay sheegtay in inkastoo dadaallo badan la sameeyay, haddana aysan suuragelin in la helo xal u saamaxa Garsoore Cartan inuu ka qeyb galo tartanka. Dowladda ayaa xustay in arrintan ay tahay mid laga xumaado maadaama uu Cartan matalayay Soomaaliya heer caalami.
Bayaanka ayaa sidoo kale lagu ammaanay Garsoore Cumar Cartan, iyadoo lagu tilmaamay inuu yahay tusaale muujinaya kartida, dadaalka iyo horumarka ay gaari karaan dhallinyarada Soomaaliyeed. Wasaaraddu waxay sheegtay in guulihiisa ay sharaf u yihiin dalka iyo bulshada Soomaaliyeed.
Dowladda Federaalka Soomaaliya ayaa mar kale xaqiijisay inay sii wadi doonto taageerada ay siiso Garsoore Cartan iyo guud ahaan bahda ciyaaraha. Waxaa la sheegay in la xoojin doono dadaallada lagu horumarinayo xirfadlayaasha Soomaaliyeed si ay uga faa’iideystaan fursadaha caalamiga ah ee mustaqbalka.
Dhanka kale, wasaaraddu waxay u mahadcelisay shacabka Soomaaliyeed iyo bahda isboortiga ee muujiyay taageerada ay u muujiyeen Garsoore Cartan muddadii ay socotay arrintan.
