Wararka24: Ciidamada ammaanka Soomaaliya ayaa maanta howlgal ka fuliyay hoteelka Elite oo ku yaalla xeebta Liido ee degmada Cabdicasiis, xilli ay socdaan baaritaanno iyo howlgallo lagu sheegay uruurinta hubka sharci darrada ah ee ka socda qaybo kamid ah magaalada Muqdisho.
Wararka laga helayo goobta ayaa sheegaya in ciidamada ay gudaha u galeen hoteelka, kadibna ay sameeyeen baaritaanno amni. Howlgalkan ayaa qeyb ka ah hawlgallo ay hay’adaha ammaanku ka wadaan degmada Cabdicasiis tan iyo maalmihii la soo dhaafay.
Cabdullaahi Maxamed Nuur, oo ah milkiilaha Hoteelka Elite, ayaa sheegay in ciidamada xoog ku galeen hoteelka isla markaana ay shaqaalaha ku ururiyeen meel gaar ah inta ay socdeen baaritaannada. Wuxuu ku dooday in howlgalkaasi uu sababay cabsi iyo jahwareer ka dhex dhacay shaqaalaha goobta.
Milkiilaha hoteelka ayaa sidoo kale sheegay in uu ka walaacsan yahay saameynta uu howlgalka ku yeelan karo ganacsiga iyo hantida taalla gudaha hoteelka. Wuxuu ku eedeeyay dowladda Federaalka inay mas’uul ka tahay wixii khasaare ah ee ka dhasha howlgalkaasi.
Dhanka kale, hay’adaha ammaanka ayaan weli soo saarin faahfaahin rasmi ah oo ku saabsan natiijada baaritaanka laga sameeyay Hoteelka Elite ama eedeymaha uu soo jeediyay milkiilaha goobta. Dowladda ayaa hore u sheegtay in howlgalada socda ay ujeeddadoodu tahay sugidda amniga iyo uruurinta hubka aan sharciga waafaqsaneyn.
Xaaladda degmada Cabdicasiis ayaa guud ahaan deggan maanta, inkastoo ciidamada ammaanku ay sii wadaan howlgallada ay ka wadaan degmada. Dadaallada lagu xoojinayo amniga ayaa socda iyadoo la doonayo in laga hortago isku dhacyo iyo rabshado horleh.
