Wararka24: Madaxweynihii hore ee Soomaaliya Maxamed Cabdullaahi Maxamed (Farmaajo) ayaa maanta booqasho ku tegay Madaxweynihii hore Sheekh Shariif Sheekh Axmed, iyadoo kulankooda uu diiradda saaray xaaladaha siyaasadeed ee dalka iyo xiisadaha ka taagan Muqdisho.
Sida ay sheegeen ilo xog ogaal ah, labada masuul ayaa ka wada hadlay dagaalkii dhowaan ka dhacay degmada Cabdicasiis ee magaalada Muqdisho iyo saameynta uu ku yeeshay amniga iyo xaaladda guud ee dalka.
Farmaajo ayaa sidoo kale muujiyay taageero uu u hayo Sheekh Shariif, isaga oo ka hadlay dhacdadii lagu hor istaagay kolonyada Shariif xilli uu kusii jeeday hoygiisa ku dhow garoonka diyaaradaha Aadan Cadde.
Kulankan ayaa yimid kadib markii Sheekh Shariif uu xalay qaabilay wafdi ka socday dowladda Turkiga oo wada dadaallo lagu xalinayo xiisadaha siyaasadeed ee u dhexeeya dowladda Federaalka iyo mucaaradka.
Wafdiga Turkiga ayaa horay kulan ula yeeshay Madaxweynaha Soomaaliya Xasan Sheekh Maxamuud, iyagoo ka wada hadlay arrimaha siyaasadda dalka iyo doorashooyinka la qorsheynayo inay qabsoomaan. Kulamadaasi ayaa qayb ka ah dadaallo lagu raadinayo isfaham siyaasadeed.
Xogaha la helayo ayaa tilmaamaya in dhinacyada siyaasadda ay isla meel dhigeen fikradda ah in la dhiso guddi farsamo oo ka shaqeeya qodobbada muranka ka taagan yahay, si loo diyaariyo hannaan lagu xallin karo khilaafaadka jira.
Dowladda Turkiga ayaa sii waddo dadaallada dhexdhexaadinta, iyadoo daneynaysa in Soomaaliya ay gaarto xasillooni siyaasadeed oo taageerta iskaashiga, maalgashiga iyo mashaariicda horumarineed ee labada dal ka dhexeeya.
