Baarlamaanka Dowlad-goboleedka Koonfur Galbeed ayaa doortay guddoon cusub kadib doorasho ka dhacday magaalada Baydhabo oo ah xarunta ku-meelgaarka ah ee maamulkaas.
Doorashada ayaa lagu doortay Mahad Maxamed Sheekh Xasan inuu noqdo Guddoomiyaha Golaha Wakiillada Baarlamaanka 3-aad ee Koonfur Galbeed. Sidoo kale, Aadan Xasan Usaama ayaa loo doortay Guddoomiye Ku-xigeenka 1-aad, halka Shamso Maxamed Yarow loo doortay Guddoomiye Ku-xigeenka 2-aad.
Xildhibaannada Golaha Wakiillada ayaa codkooda ku doortay hoggaanka cusub, kadib maalmo ay ku jireen dhameystirka geeddi-socodka dhismaha hay’adaha maamulka Koonfur Galbeed.
Doorashadan ayaa timid kadib markii la dhisay Baarlamaanka 3-aad ee Koonfur Galbeed, kaas oo maamulka uu sheegay inuu ku yimid hannaanka doorashooyinka qof iyo cod. Hannaankan ayaa horay uga soo horjeestay siyaasiyiin mucaarad ah iyo maamullada maamullada Puntland iyo Jubaland.
Waxaa hadda la filayaa in baarlamaanka cusub uu guda galo wajiga xiga ee doorashooyinka, iyadoo la qorsheynayo in 10-ka Juun la doorto Madaxweynaha Dowlad-goboleedka Koonfur Galbeed.
Dhanka kale, Madaxweynaha Soomaaliya, Xasan Sheekh Maxamuud, ayaa hambalyo u diray guddoonka cusub ee Baarlamaanka Koonfur Galbeed. Madaxweynaha ayaa ugu hambalyeeyay Mahad Maxamed Sheekh Xasan, Aadan Xasan Usaama iyo Shamso Maxamed Yarow xilalka loo doortay.
Madaxweyne Xasan Sheekh ayaa mas’uuliyiinta cusub kula dardaarmay inay si hufan, daacadnimo leh oo mas’uuliyad ku dheehan tahay ugu adeegaan shacabka. Wuxuu sidoo kale ku boorriyay inay ka shaqeeyaan xoojinta dowladnimada, horumarinta nidaamka dimuqraadiyadda iyo adkeynta hay’adaha dowladeed.
Madaxweynaha ayaa sidoo kale bogaadiyay sida haboon ee ay doorashadu u dhacday, isagoo ammaanay xildhibaannada Baarlamaanka Koonfur Galbeed kaalinta ay ka qaateen dhismaha hay’adaha maamulka iyo ilaalinta xasilloonida.
